Barpeta nung Muslim nunger merenshir 4 jangjaogo

Barpeta, June 21 (Agencies): Barpeta nung nisung telok kati Muslim nunger kar züka merenshiba aser ‘Jai Shri Ram’ ta shidaktsürtem maitsü jangjaogo aser kobi melii aputsü ta police-i ashi.
Parnok nisung pezü indang maitsü jangjaogo aser kobi melii aputsü, ta Additional Superintendent of Police Pankaj Kumar Kakati-i ashi.
Police-i social media sabangtem nung olulu prokshiba noktangtsü atema mita reprangdar. Shiri ashishitep aketba osangtem prokshidir, parnok nem tapet temerenshi agütsütsü, ta SP Kakati-isa ashi.
Iba tatalokba atema All Assam Minority Students’ Union (AAMSU) aser North-East Minorities Students’ Union (NEMSU) teloktemi right-wing ka anema FIR tem benoka lir.
June 18, 2019 nü nisung telok jagi Muslim nunger züka merenshi aser “Jai Shri Ram” o “Pakistan Murdabad” yimyim ayimdaktsü.
Iba tatalokba indang video ka social media nung prokshiba sülen osang meteta aküm, ta police-i ashi.
June 18 nü right-wing telok ka nung züngsemtem ta ashirtemi Barpeta jila nung autorickshaw ka anendaktsü aser idakji mena alirtem züka merenshi. Parnokisa Muslim nungertem dang “Jai Shri Ram”, “Bharat Mata ki Jai” aser “Pakistan Murdabad” yimyimtem ayimdaktsü.
Barpeta nungi Congress MLA Abdul Khaleque-i superintendent of police dang iba tatalokba atema mapa shitak inyaktsü shiogo.