Baseball bat bener nisung ka Taylor Swift’er kima apu

Chiteni/July 24, 2019 (Agencies): Iowa nung alir nisung ka nüngtugu kenter Taylor Swift’er ki semdangtsü nükjidong nung Rhode Island-i aruba puogo. Pa ket nung ki kakpoka atutsüba hadir bener aliba atema aitsü, ta Police-i Mongolbarnü metetdaktsü. Hopta tatemi arishi küm 32 tain Page Liddle, ket nung lock picks 30 dak tema, kichiba kakpoka atutsüba hadir ka aser aluminum baseball bat ka ta bener Westerly kübok beachfront jila nung senzüa lia police tem apu aser iba atema pa aitsüogo.
Local osang kaket ajanga ashiba agi, Liddle ya Taylor Swift den ajurutepi arua liasü aser pai ashiba agi Swift tena kanga junga metettepa lir. Police chief Shawn Lacey-i iba osang ya Mongolbarnü AFP nem metetdakja liasü.
Iba amala tatalokba ka taküm küm March ita nunga atalokogo.
Westerly Sun sangdong ka ajanga ashiba agi, Liddle ya meita ataa liasü aser Lacey-i ashiba yami metetdaktsü, “pai taoba mapang nung Taylor Swift indang tanga ki-a semdanger alitsü südi.”
Temulung melemi pur alisang ya tatalokba ka melei puogo aser pa nem Swift’er ki anasa marutsü asoshi kecha tetuyuba magütsü. Maneni pa tekelok tendangtsü.
Swift shiba iba ya atalokdang Rhode Island nung maliasü la taoba mapang nunga mejangjaba nisungtem semdangogo. March ita la meita alir ka apu shiba küm ka majung tsüngda anaben tashi pua liasü. Pa Manhattan nung aliba Swift’er ki kakpoka aiba atema apu.
Roger Alvarado shiba Tribeca nung Swift’er ki anasa arutsü memelar, pai aonung kichiba ka kakpoker ai saka iba mapang nung Swift kidang maliasü.
2018 küm April ita pa apu ka amshia lar kidangi soketa atu aser iba mapang nunga la maliasü.