BASN-i Miss Nagaland 2016 Semifinalist tem tenüng metetdaktsüogo

Dimapur, November 14 (TYO) : Beauty & Aesthetics Society of Nagaland (BASN)-i Miss Nagaland 2016 atema Semifinalist tem tenüng kanga pelashishia metetdaktsür. Tang parnok aiür tobur tajung 14-i tetendangba aika ajangteta atur semifinal jenjang tongteta lir, ta BASN sangdong ka ajanga metetdaktsü.
Sangdong ajanga ashiba agi, iba tetoktepba nung Nagaland tesem aika nungi aiür 18 arua audition aser, ajisüaka parnok rongnungi nisung 11 ang shimteta district asem nung takok ngua alirtem den züklokba ajanga parnok 14 aküm.
BASN tenteter taküm küm 25 ajunger anungji iba bejongji December 8, 2016 nü RCEMPA , Jotsoma nung akatsü aliba Miss Nagaland 2016 sentong den repa amongtsü. Iba sentong nung artiste mongintem aser ano tang atuya-a aliba lanurtem shilem agitsü. Sentong rangben Miss North East 2006 Tiarenla Jamir den Miss Dimapur 2014 Zehovire Avi Kechu aser Miss Tuensang 1st Runner up 2013 Moasenla nungeri ketdang asütsü. Benile Kent makeup artiste asütsü aser Alemla Ozukum aser Theja Sekhose nati design aser Choreograph asütsü. Hair stylist Achi Imchen asütsü aser Mayangchujang-i noksa tangoktsü, ta sangdong nungsa shia lir.