Buenos Aires, August 02 (Agencies): Taoba Argentina football asayar, Edgardo Bauza Argentina football coach tanü, Mongolbar nü shimogo.
Bauza-i taoba coach, Gerardo Martino melenzüka Argentina team coach tasenba akümtsü.
Taoba July ita asayaba Copa America football asayamong final nung par Argentina teloki tamakok anguba sülen par asayar mongin, Lionel Messi den aroki Martino-i Argentina national team toktsüba yong pa melenzüktsü asoshi Bauza tan shimer lir.
“Argentina telok coach tasenba inyakdaktsütsü asoshi Bauza shimogo. Pa lenisüba kübok Argentina teloki takok tulu angutsü ta pa dak tamang akar,” ta Argentine Football Association-i metetdaktsü.
Arishi küm 58 tain Bauza-i taoba mapang Argentina nung tentetba Rosario Central aser Independiente, Colombia nung tentetba Junior de Barranquilla aser Mexico nung tentetba Varacruz telok tenüng nung football asaya aru.
Pai asayatsüren toktsür coach inyaktsü tenzükba sülen pa lenisüba kübok Ecuador nung tentetba Liga Deportiva de Quito aser Argentina nung tentetba San Lorenzo teloki Copa Libertadores asayamong takok marok 2008 aser 2014 küm ajangzükba osanga jangjaogo.
Bauza lenisüba kübok par Argentina teloki Uruguay telok den Argentina kübok Mendoza nung 2018 World Cup qualifying asaya ka taruba September ita 1 nü asayatsü.
You must be logged in to post a comment Login