Bayern Munich-i Alexis Sanchez malitsü

Berlin, July 17 (Agencies): Bayern Munich boss Karl-Heinz Rummenigge-i taruba season atema Arsenal striker Alexis Sanchez alitsü asoshi sentong aliba toktsüogo ta jangjatsüogo.
Carlo Ancelotti-i jangraa aliba ama taoba hopta Colombia nunger striker James Rodriguez loan nung Real Madrid nungi sign asüba sülen Bayern puri Chile nunger Sanchez Arsenal nungi alizüknüa aliba tejangraba toktsüogo.
“Onoki joko Sanchez alitsüba maparen toktsüogo. Onoki coach den molungtepogo aser attack nung joko asayar ojang dang alitsü,” ta Bayern mendembuba Rummenigge-i osangbenertem dang ashi.
Bayern pur Manchester City den külemi Sanchez alitsü asoshi merangya liasü. Arishi küm 28 tain Sanchez ya Chile nunger rongnungi goal timtiba agütsüsang lir aser pa Arsenal den tezüngzüktepba yangluba ano küm ka anunga lir saka pa iba club nungisa maneni asayatsü asoshi jembitepdar.
Britain nung osang ajanga ashiba agi pa sen million £80 (US$103m, 90m euros) yong ayoktsü akok, saka Arsenal manager Arsene Wenger-i taoba hopta iba sentong ya madaloktsü ya shiogo.
Bayern pur pre-season tour China aser Singapore nung asayatsü aliba Bodhbarnü nungi tenzüktsü. Parnok Arsenal den Shanghai nung mezüng asayatsü.