BBC-i shimetba tetsür 100 rongnung Manipur tsür ka densema lir

Imphal, November 23 (Agencies): BBC India-i, ozüng tajungba küma melenshir, tetuyuba tajung agütsür aser tatishitsü tajung sayutetba tetsür 100 shimteta lir.
BBC-i 2015 atema shimtetba tetsür 100 rongnungji Manipur tsüra ka dena lir. Lai kanga meranga aser temulungtetba tajung agi inyakba ajanga iba akümket jenjangi ai.
Northeast nungi Manipur tsür, Ramina Haorokcham ya tetsür 100 shimteta aliba rongnung mezüng tarensen 10 nung lir.
La den külemi shimteta alir rongnung Asha Bhosle, Sania Mirza, actress Kamini Kaushal, Ektaa Kapoor aser Gauri Singh nungera lir.
Ramina ya Impal nungi aser yangji school azüng. Iba sülen Delhi nung graduate asü.
Graduate asüba sülen ano azünga meli China nung oa MBA degree agir küm asem yangjisa mapa inyak. Lai la nükjidong ulushitsü asoshi India-i meyiba arua la meyong business tenzüktsü mulungtet.
Haorokcham ya Noida nung aliba Gojilove.com ngutetla aser kibur lir. Iba company ya taküm February nung tenzük.
Gojilove ya online ajanga telung süoshi, iba dak sentakba oset, tzü awadang asemba süoshi aser tanga süoshi aika ayokba company ka lir. Iba company ya lanur arishi küm 18 nungi tekalen alirtem nüngdakbatem ataloktsütsü nükjidong nung tenzükba lir.
Gojilove nung mapa inyaker nisung 4 shi lir aser company nung fund ajak la ket nung aliba amshir.
Item süoshi website ajanga marendaki ayokba ajanga nüburtem tangatetba melenshitsü aser shisatsü temerükba akümtsü, ta la tamang aser timla.
India ama linük ka nung shi nung medemba otsü yimjak nung jembitsü memelar. Ajisüaka lai telung süoshi aser iba dak sendakba osettem online ajanga ayoktsü tenzükba ajanga la tajung nung tasü aitba sayur.
Ramina ya NASSCOM indang tetsür entrepreneurs tarensen nunga densema lir.