BCCI-i India cricket coach menden atema nisung 21 shima lir

Mumbai, June 16 (Agencies): Sachin Tendulkar aser Sourav Ganguly na densemba taoba India cricket captain-tem densemba ludeni nisung 21 rong nung nisung ka tan June ita 22 nü shima India’er taruba cricket head coach menden bendaktsütsü renemba osang ka India ajunga nung cricket asayatsüren ketdang asür, Board of Control for Cricket in India (BCCI)-i tanü, Brehostibar nü metetdaktsüogo.
Nisung jenti meshimtsü sentong renemaka, India’er head coach tasenba menden abentsü asoshi tejangrar nisung 57 tashi coach menden abentsü mulungba onük BCCI den benoka liasü.
“Taoba test batsman, VVS Laxman züngsemba coach tasenba shimtsü ludeni nisung 57 rong nungi parnok nisung 21 tashi tanü tashi nung shimshia lir,” ta BCCI secretary, Ajay Shirke-i metetdaktsü.
Taküm, 2016 küm tetenzüklen India nung ayonga asayaba World Twenty20 (T20) asayamong nung India semifinal asaya nung tsüker külen Ravi Shastri-i team director menden toktsüba sülenbo India’er head coach mendenji tanü tashi azüngteta aliba osang bushitetogo.
Shastri densema, taoba India captain, Anil Kumble-ia international cricket asayatsüren nung tongti menden, India’er head coach menden abentsü asoshi jangraba osang metetdaktsüogo.