BCCI-i India tsür cricket asayar nem sempet tulu agütsütsü nangzük

July 22, 2017 (Agencies): Tetsürtem cricket World Cup final Lord nung Deobarnü India tsür aser England tsür tsüngta asayatsü lia Board of Control for Cricket in India (BCCI) ajanga iba asayamong nung tetsürtem cricket asayar shia nem sen lakh 50 agütsütsü nangzükogo.
Iba den külemi BCCI ajanga iba asayamong nung yariteper nisung (supporting staff) shia nem sen lakh 25 agütsütsü sangdong.
Teburtem cricket asaya World Cup tenzüktsü küm ana lia 1973 küm tetsür atema cricket asaya World Cup ya tenzük, saka iba asayamong ya England aser Australia nati dang melentepa kokyonga aru aser New Zealand-i 2000 nung akok.
Taküm iba asayamong tenzükdang Derby nung June 24 nü India tsür temi England telok ya runs 35 agi koka lir.
India tsür temi Brehostibarnü Derby nung iba asayamong trokben koka aliba telok, Australia madak semi-final nung takok anguba sülen, “England asoshi temela masütsü,” ta India captain, Mithali Raj-i ashi.
India tsür Harmanpreet Kaur-i runs 171 (not out) agitetba ajanga taoba küm iba asayamong takok ngua aliba telok, Australia madak runs 36 agi takok angu.
Iba asaya nung Deepti Sharma-ia rung 98 nguteter lia run out asü.
Tetsürtem One Day International (ODI) nung India tsür Jhulan Goswami-i run timba aser wicket timtiba agiteta otsü yanglua lir.
Centurion, South Africa nung 2005 küm World Cup final asayadang Australia-i runs 98 agi India tsükdaktsür küm 12buba nung India tsür ya final nung lir.
India tsür rongnung Raj aser Goswami-na dak dang temolung lema malir saka Smriti Mandhana, Punam Raut aser Sharma nungertemia kanga junga asayar.
England telok ya iba asayamong mezüng asaya nung India-i tsükdaktsüba sülen run asem agi Australia telok ya pool asaya nung akok aser semi-final nung wicket ana agi South Africa madak takok angu.