BCCI-i Lodha committee-i ngutetba nung ajemdaker inyaktsüsa akümer

Kolkata, July 18 (Agencies) : Taoba mapang Board of Control for Cricket in India (BCCI) nung Tir Shashank Manohar-i, “BCCI-i parnok tejak tententsüsa tajung kecha meinyakteter aser tang Lodha Committee-i ngutetba nung ajemdaker inyaktsüsa akümer,” ta Honibar nü India Today TV osangbenertem dang ashi.
2013 küm Indian Premier league (IPL) nung ‘spot-fixing’ asüba jateta adokba mapang anenadoktsüba asü, ta taoba mapang BCCI nung Tir aser tang International Cricket
Council’s (ICC) nung mendenbuba N. Srinivasan dang Manohar-i ashi.
Manohar-i, N. Srinivasan dang ICC mendenbuba mendena tokjang, ta ashi.
“Srinivasan-i 2013 küm pa mapa toktsütsüba asü, pa ya mepetmesü adokba tera tamajungtiba lir, ICC menden nungia tangsa tang alutsü,” ta Manohar-i ashi.
“BCCI-i iba mepetmesü bentettsü atema kecha meinyaktet anungji court-i inyaktsüogo. BCCI-i kija masü saka lokti atema bilema inyaktsüla,” ta pai ashi.
2013 küm nungi ataloka aruba nung sensak asemtsü asoshi Manohar-i tang BCCI nung Tir Jagmohan Dalmiya’er kidangi Hokolbar aonung 10:30 ako meta ao.
2013 küm spot-fixing aser sen tapitepba dak sentakba nung bushisüngdangtsü asoshi Supreme Court-i shimteta yutsüba, Justice Lodha Committee ajanga Chennai Super Kings (CSK) aser Rajasthan Royals team na Mongulbar nü IPL asaya nungi küm ana asoshi anendaktsüogo.