BCCI-i Northeast atema luden tasen ka tenteter

New Delhi, April 06 (Agencies): India ajunga nung cricket asayatsüren ketdang asür, Board of Control for Cricket in India (BCCI)-i Northeast atema luden tasen ka, New Area Development Committee tentettsüogo.
Iba luden tasenba nung Abhishek Dalmiya Chairman; BCCI Secretary, Anurag Thakur Convenor aser Meghalaya Cricket Association Joint-Secretary, Naba Bhattacharya Co-ordinator alitsü aser iba ludeni India ajunga nung cricket temaba jenjang nung ajungkettsütsü maparen inyaktsü.
“BCCI-i Meghalaya, Arunachal Pradesh aser Nagaland nung tentetba cricket tentettem nem teyari sen lakh 50 dang agütsüba osang bushitetogo,” ta shia, BCCI-i Northeast sendoka yutsüba atema Supreme Court-i BCCI aitsüba sülen BCCI-i tan luden tasenbaji tenteter lir.
“BCCI-i mapang shia teyari sen agütsütsü asoshi lateta lir. Ajisüaka, 2009 küm nungi tenzüka tanü tashi teyari sen kecha mongui lir,” ta Nagaland Cricket Association Joint-Secretary, Ahidur Rahman-ia Northeast nem teyari sen magütsüba osang metetdakja liasü.
Northeast nung tentetba state 11 nem agütsütsü atema sen meli akümba osang ka BCCI-i metetdaktsüba sülen Supreme Court-i BCCI aitsüba osang jangjaogo.
“State balala nung tentetba cricket tentettem rong nung terenlok lidaktsütsü asoshi küm ka atema sen crore 480 tashi BCCI nem lemzüktsüogo,” ta shia, taoba küm 5 tsüngda nung sen lemshiba kuli tejangja benoktsü asoshi Chief Justice of India, TS Thakur-i aniba okadak mendeni BCCI dang tuyuogo.