BCCI Tir Jagmohan Dalmiya süogo

Kolkata, September 20 (Agencies): Board of Control for Cricket in India (BCCI) Tir Jagmohan Dalmiya-i Brihostibar aonung teku nung tashitsü atur ta ashiba sülen BM Birla Heart Research Institute-i anir ao saka tia makai pa Deobar nikongdang arishi küm 75 nung süogo.
Pa mozü kidangi anir aoba sülen Honibar nü temang junga shia aruogo ta sangdonga liasü. Doctor temi, pa mozü agiba ajanga temelenshi lir, saka maneni mapang tatsükabo temang tendanga anepalutsü nüngdaker, ta ashi.
West Bengal Chief Minister Mamata Banerjee-ia mozü kidangi oa pa nem akhümtsübu agütsütsüogo.
“Jagmohan Dalmiya asüba ya kanga tesasatsü aser tejashitsü ka lir. Pa ya saisapong ketdang asüba nung tongti nisung ka liasü. Ni pa nem tatembangbuba akhümtsübu agütsüi aor,” ta Banerjee-i Twitter ajanga lemsatepa liasü.
Pa mozü kidang amung piyong par jabaso Abhishek Dalmiya-a pa den liasü ta angashiogo. Tesüiba mapang India cricket team nung captain, Sourav Ganguly aser minister in-charge of sports (West Bengal) Arup Biswas napronglai pa mozü kidangi oli semdanga liasü.
Iba den külemi Cricket Association of Bengal (CAB)-ia mozü kidangi oa pa semdangba osang jangjaogo.