B’desh-i kiralongra anema raraba nung India-i yaritsü: PM Modi

New Delhi, July 21 (Agencies): Brihostibarnü video conferencing ajanga Ato kilonser, Narendra Modi aser Bangladesh Ato kilonser, Sheikh Hasina nati senteper Petrapole Integrated checkpost lapoktsüogo.
Iba sentong nung jembidang Modi-i, “Bangladesh-i kiralongraba anema raraba nung India dena lir, aser iba dak sentakba nung akokba ajak agi yaritsü,” ta metetdaktsü.
Petrapole checkpost lapokba ajanga linük ana tsüngda shishilembaba jenjang ajungketba dang masü saka linük anaprong rongsenkettsüng ainba nung yaritsü, ta Modi-isa ashi.
Tarutsü nung iba ama Integrated Check Post (ICP) 8 India-Bangladesh arrtsü nung yanglutsü, ta paisa metetdaktsü.
Modi-i Sheikh Hasina dang, “Ni Bangladesh Ato kilonser aser sensotem dangi Eid salem osang abener. Kiralongrartemi Kishoreganj nung Eid benjung amungertem amakbaji ni aitsür,” ta ashi.
Petrapole-Benapole ya India-Bangladesh shishilembaba atema tongtibang arrtsü ka lir aser India-Bangladesh shishilembaba shilem 50 dak temabo Petrapole ajanga shibelener.
Iba checkpost ajanga sen crore 15,000 dak tema shishilembar.
Petrapole ICP ya India-Bangladesh border arrtsü nung tanabuba ICP lir. Mezüngbuba ICP ji Agartala-Akhaura arrtsü nung aliba Agartala ICP lir.