B’desh’s Asst High Commissioner-i India teyari meshi

Agartala, October 25 (Agencies): Myanmar nung Rohingyas nunger reshikangshiba aser parnok Bangladesh-i senoka aiba dak sendakba nung India nungeri India nung parnok mejenokdaktsüi kanga tekong meranga nokdakba mapang ka nung, Bangladesh, Assistant High Commissioner-i iba ken o dak sendakba nung teyari meshiogo.
India nungeri India nung Rohingya refugees tem nem tejenokdak makajaka Bangladesh nung parnok jenoka aliba camp temibo relief osettem yokdar.
Bangladesh, Assistant High Commissioner, Shakhawat Hossain-i Tripura, Agartala semdangba mapang nung refugees tem Myanmar-i tekaratiba nung yoktsü atema India nunger teyari meshiogo. Pai ashiba agi, Rohingya nunger atema telemtetba tajungtibaji par limai meyipa yoktsübaji asütsü.
Agartala, OKD Institute of Social Change and Development nung Tripura University-i ayongzükba workshop nung o jembidang Hossain-i ashiba agi, Rohingya refugees tem par linüki meyipa yoktsüba atema India-i Myanmar sorkar ajungshitsüba atema parnoki imlar.
South East Asia nung India nunger tashi dak sendakba nung Shakhawat Hossain-i ashiba agi, India ya tashitait linük ka lir aser parnok Bangladesh o Myanmar na den kidanger ama tesendaktep tajung lir. Bangladesh nungeri India-i refugee tem atema teyari agütsüba asoshi pelaba lemsatepba den Rohingyas nungertem par linüki tekaratiba nung meyipa yoktsüba atema India teyari nüngdakba lemsatep.
Kasa mapang nung ketdangser-isa ashiba agi, India nung Bangladesh, High Commission-i tarutsü nung iba amala mesükba onük nung sensaksem aser workshops akatsü asoshi teyari agütsütsü. Paisa ashiba agi, par mission ajanga, Tripura University aser Dhaka University mesera Jahangirnagar University aser tanga Bangladesh educational institutions tem tsüngda inyakyim balala nung sendakteptsü asoshi teyari agütsüner.
India Bangladesh Border and cross border relations dak sendakba nung anogo ana Workshop akaba October 24 nü tembangogo.
Iba workshop ya Omeo Kumar Das Institute of Social Change and Development aser Department of Journalism and Mass Communication, Tripura University den Japan, Sasakawa Peace Foundation-i, sentepa ayongzükba sentong ka liasü.