Beatles producer Sir George Martin süogo

London, Marc 9 (Agencies) : British nunger music producer mongin George Martin arishi küm 90 nung süogo, ta Bodbarnü Beatles drummer Ringo Starr-i metetdaktsü.
George Martin ajanga Beatles telok alima nung nüngtugu kümdaktsü.
“Tsüngremi George Martin moajang aser Judy aser par kibong dangi temeim abener. George kanga menungratsü” ta Starr-i Twitter nung metetdaktsü.
Martin ya January 3, 1926 anogo Highbury, London nung so. Pa tanur asüdang piano atemer ka liasü aser 1943 küm pai Royal Navy nung Fleet Air Arm nung züngsem. World War II sülen pa BBC indang Classical Music Department nung inyak aser iba sülen EMI records nung mapa inyak.
Mapang talangka pai British nunger mongin Peter Sellers, Dudley Moore aser Bernard Cribbins nunger asoshi comedy records yanglutsü.
1962 tetenzüklen Martin-i Beatles den ajurutep. Iba mapang England nung Beatles sapurtem aika liasü, saka recording mapa tulu mongui liasü. Beatles indang manager Brian Epstein-i Martin dang mepishi aser idangji pai Beatles indang demo tape angadangtsü mulunga agizük.
Asür Martin tenüngji Beatles den kanga sendaktepba bilemtettsü saka paisa Gerry and The Pacemakers, Kenny Rogers, Cheap Trick aser Celine Dion nunger indnag kenseptem produce süogo.
Princess Diana nem tetushi agüja Elton John indang “Candle In The Wind” version tasen yanglu aser ibaji asür Martin-i produce asü. Iba ken ya teti atema singles tajungtiba rongnung züngsem.