Begum Jaan film Pakistan nung mesayatsü

April 13, 2017 (Agencies): Dangal, Jolly LLB 2 aser Naam Shabana sülen Vidya Balan-i shilem agiba film Begum Jaan Pakistan nung mesayadaktsütsü. Iba film ya Pakistan o India na pilaba mapang atalokba otsü dak ajemdaker yangluba film ka lir, aser Pakistan nung iba film mesayatsü, ta producer Mahesh Bhatt-i jangjatsüogo.
Osangbener den jembidang Bhatt-i ashiba agi, “Pakistan nung kü distributor-i ashiba agi, India o Pakistan na pilaba dak sendakba otsütem par lima nung mesayadaktsütsü asoshi policy lir. Iba osang angazükba sülen Pakistan censor board nung tongtibang ketdangsertem dang film reprangdanger telemtetba agitsü asoshi mepishiogo. Parnoki iba dak sendakba nung asadangtsü ta nangzüka liasü, saka tang tashi kecha osang mali.”
Srijit Mukherji-i direct asüba film Begum Jaan ya Bengali film Rajkahini yanglushir adokaba lir. Film ya India aser Pakistan na arrtsü nung tekep ayokertem aliba tesem ka indang otsü lir aser linük ana pilaba mapang parnok iba tesem nungi aotsü asoshi tetuyuba agütsüba mapang tatalokbatem film nung sayur.
“Mapang tatsüka lir kü distributor ajanga, Begum Jaan film Pakistani pa ajanga bener arutsü asoshi temelaba magütsüba pai metetdaktsü,” ta Bhatt-i shisem.
Film nung Vidya Balan, Gauahar Khan, Pallavi Sharda, Ashish Vidyarthi, Rajit Kapur, Chunkey Pandey aser ano tangar kari shilem agir.
Anogo ishika tejakdanga Aamir Khan indang film Dangal-a Pakistan nung mesayateti liasü. Pakistan Censor Board ajanga film nung shilm ana intoktsü asoshi asüngdang. Mezüngbuba nung national flag adokba aser Indian national anthem atemba shilemtem film nungi intoktsü asoshi metetdaktsü. Producer Aamir Khan-i item shilemtem intoktsü asoshi memolungi, Pakistan nung iba film mesayatsü asoshi telemtetba agi.
Taapsee Pannu indang film Naam Shabana-a Pakistan nung mesayatet kechiyong film shilem ka nung kiralongrartem dak sendakba shilem densema liasü. Maneni Akshay Kumar-i shilem agiba Jolly LLB 2 nung shilem kar nung Kashmir indang jembiba atema mesayatet.