Begusarai nungi zünger mapa mangusang Kanhaiya Kumar-i tokteptsü

Patna, Rongchii/April 10 (Agencies): India nung kaketshir lennir rongnung nüngtugu, Kanhaiya Kumar, shibai takartiba party BJP indang minister ka den tokteptsü renemdar, pai küm ana nung sen lakh 8.5 aazükba sangdongogo.
Bihar indang Begusarai constituency nungi pa indang nomination atema pai file asüba affidavit nung ken o 5 densema lir, koba ajanga küm asem tejakdang pa kanga nüngtugu aküm.
2016 küm February ita ozüng anema aibelenba ajanga JNU students’ Union, lennir, Kanhaiya Kumar den külem kaketshir Umar Khalid aser Anirban Bhattacharya na pua liasü.
Iba ken o nung – 2001 küm Parliament amaksang, Afzal Guru sosetta südaktsüba nung ajemdaker sentong ka nung Kumar-i linük anema yimyim ayimba densema lir.
Arishi küm 32 tain Kumar ya pa aliba tesem nung Left candidate ka küma liasü, koba candidate asem tokteptsüba atema renema lir. BJP nung Union Minister Giriraj Singh aser Lalu Yadav indang Rashtriya Janata Dal, koba Begusrai atema teimla tulu nung Tanveer Haasan na densema tokteptsü.
Taoba student lennir, Kümar indang affidavit nung, zünger mapa mangur ka shibai ocet kar zülur aser sen azüktsü atema university balala nung lecturer ama inyaker. Pai ashiba agi, pa indang kaket “Bihar to Tihar” ayokba ajanga sen timtiba aazüker.
Pa ket nung sen 24,000 aser bank nung investments & savings sen 3,57,848 lir, ta Affidavit nungsa zülua lir.
Maneni, Kumar indang affidavit nungji, pa tetsü-tebou senmang, Begusarai nung ki ka koba decimal 1.5 li nung yanglua aliba aser iba jenjang lakh 2 asütsü. Pa ket nung alu mali. Pa tebu ya aluyimer aser tetsü anganwadi nung inyaker, ta shia lir.
Ajisüaka, tan election nung Kanhaiya Kumar ya sensaktiba candidate ka masu.
Telangana indang Chevella Lok Sabha constituency nung JDU ticket nungi tokteptsü alisang Nalla Prem Kumar-i pa ket nung akaba ajak agi sen 500 aliba sangdongogo.
Ano külen, Koraput Odisha nungi tokteptsü alisang Rajendra Kendruka-i, pa ket nunga sen 565 aliba sangdongogo. Taoba mapang Maoist pusemsang, küm 27 tain Rajendara-i CPI- ML ticket nungi tokteptsü.