Beijing, February 28 (Agencies): Jiangxi province, China nung aliba küm 2,000 tejen leper ka nungi ‘artefacts’ 400 dak tema Beijing yimtiba indang Museum nung ayutsü sentong lir.
March 2 nungi June 2I tashi sayutsü aliba oset 400 ya oset 20,000 rongnungi shimtetba lir. Item osettem ya 2011 küm nungi tenzüka (Marquis of Haihun) leper atuba mapang nungi ngutetba lir, ta Deobarnü museum otongdar Yang Dandan-i ashiba Xinhua News Agencies ajanga metetdaktsü.
Yang-i ashiba agi, iba oset reprangtsü asoshi mezüng hopta nung anogo shia nisung 1,000 nem maongka agütsütsü aser iba sülenbo anogo nung nisung 5,000 aitdaktsütsü.
Iba amala oset sayuba ya iba tesem nung tan mezüng asütsü. Yaküm Jiangxi provincial museum nung leper nungi kaktetba oset 120 sayuba mapang nisung 180,000-i arua repranga liasü.
Haihunhou leper ya Western Han Dynasty mapang 206 BC nungi 24 AD tashi indang lir. Iba leper alimangji square metres 40,000 lir koba nung leper tila ti lir aser kor talungtsü nung rarartem aremba tesema tilaka lir.
Iba tesüiba tensa nung China nung kanga junga wazüka ayuba leperji Emperor Wu’er semchir Liu He meyong liasü. “Haihunhou” ya Liu nem agütsüba tenüng lir.
Haihun ya alemli mapang Jiangxi anüdoklentip tsütsü aliba chuba yimli tila ka tenüng lir.
You must be logged in to post a comment Login