Beijing’er WWII benjungmong nung shilem agitsü: Park

Seoul, August 20 (Agencies): World War II (WWII) tembanger küm 70 abensaba bilemteta China kübok Beijing nung amongtsü ayongba benjungmong nung shilem agitsü lemtetba osang ka South Korea Tir, Park Geun-hye-i tanü Brehostibar nü sangoktsüogo.

“Ozü Tir, Park-i Beijing nung agitsü ayongba WWII benjungmong nung shilem agitsü lemtetogo saka lai idakji ayongba mitkar parade sentong nungbo shilem agitsü asü magitsü iba osang tang tashi mejangjateti lir,” ta S Korea’er Foreign Affairs indang tongti presidential secretary, Ju Chul-ki-i osang jangjashitsü.

China Tir, Xi Jinping den senden amentsü renemba densema Park-i anogo 3 agia Beijing semdangtsü nükjidong nung taruba September ita 2 nü China bushia aotsü sentong renema lir.

Beijing-i ayongba WWII sentong nung Russia Tir, Vladimir Putin-ia shilem agitsü renemba osang angazükogo.

Ajisüaka, iba sentong nung China-i par mitkar tashi sayutsü sentong renemba osang lazükba yong West lenirtemibo iba sentong nung shilem agitsü asoshi nungnanga bilemtsü tenzüka lir.

“China-i par mitkar tashi sayuba ajanga par linük den tesendaktep mejungi aliba linüktem den tanaben sendaktepshitsü maparen nem tetsükdakba agütsütsü akok,” ta Beijing nung tenzükba European Union (EU) ambassador, Hans Dietmar Schweisgut-ia tawa metetdakja lir.

China-i mangatettep adokba South China Sea nung par mitkar ki o jen kanga sashia renemba aser tan agitsü ayongba WWII sentong nung par mitkar tashi sayutsü sentong renemba ajanga Japan nem maksü tulu bener arutsütsü sentong renemba osang jangjaogo.

Ano, Beijing-i taoba mapang, 1989 nung democracy pusemertem tashiyim agi ajemrepdak, Tiananmen Square nung par mitkar sentongji agitsü ayongba yong alima lenir aikati Beijing-i jaokba ama par sentong nung shilem agitsü mejangraba osang angazüka lir.

US-ia Beijing nungi tejaokba shiti anguba mesüra par ketdangsertem Beijing nung agitsü ayongba WWII sentong nung shilem agitsü asoshi yoktsü sentong renemba osang ka danga tanü tashi metetdakja mali.

Ano külen, Park-i tan Beijing nung ayongba WWII sentong nung shilem agitsü lemtetba ajanga par linük ana tsüngda tesendaktep tajung ayutsü temulungtetba tajung aliba kuli angur.

Iba tangatetba nung lar S Korea sorkari yaküm, 2014 küm China den tetsükdakba kecha melii shishilembatsü tezüngzüktep ka China den agiba den külemi, China-i aniba Asian Infrastructure Investment Bank (AIIB) nung züngsemtsü asoshi taküm küm tetenzüklen nangzüktepa lir.