Beirut Marathon nung nisung 50,000-i shilem agi

Beirut, November 13 (Agencies) : Deobar anepdang Lebanon yimtiba nung küm shia ayongba Beirut Marathon nung nisung 50,000 dak temai shilem agi. Iba marathon nung tenla sarur aser alima tesem ajak nungi shilem agiteter.
Lebanon Ato Kilonser Saad Hariri-a sobutsü tanak den tenük aina ka kaloker iba kilometer 7 fun race nung shilem agi aser tasem tiyalong nung külemi asemertem den selfie tangoka angu, ta Xinhua osang ajanga metetdaktsü.
Iba marathon ya anepdang 7:00 ako nung tenzük aser nisung taintem, tetsürtem, kaketshirtem etc tem atema asemtepba sentong balala 11 agia liasü.
Ajak rongnung tasaktiba aser talangtiba asembaji international yimya nung asazüka kuli agütsüba kilometer 42 asemtepba liasü. Iba asemtepbaji New Waterfront, Beirut nungi tenzüka asem aser Martyrs’ Square, Downtown Beirut nung oa tembang.
Kilometre 42 asemtepba nungji Kenyan Edwin Kibet Kiptoo-i takok angu aser Jordanian Ahmed Soumar-i kilometer 21 asemtepba nung takok angu.
Kilometre 42 asemtepba nung Lebanon tsür Shereen Njeim-i linük atema tan mezüngsüa pezübuba jenjang nung atong.
Parnok asemtepba lenmang sema tajemtsütem ayuba sabang, paramedics aser police tem renemer ata liasü. Company balala, telok tentettem, university tem aser tanga institute temi asemtepertem den yaritepa parnok ajungmesoa liasü.
Iba sentong akaba ajanga gari mejajadaktsüi nokdangba agi tesem kar nungbo traffic jam süa liasü.