Belgium Ambassador Jan Luykx-i ketdangsertem den sensaksem

Monupii (May) 8, 2018 nü nung Belgium Ambassador Jan Luykx-i o jembidang agiba noksa angur. 

Dimapur, Monupii (May) 8 (TYO): Monupii (May) 8, 2018 nü Directorate of IT&C indang conference hall nung Belgium Ambassador Jan Luykx pela agizükba sentong ka ayonga agi.
Sentongji Department of IT&C, Department of Power aser Kohima Smart City Development Ltd Company-i ayongzük.
Tanü Ambassador Jan Luykx-i Governor PB Acharya aser Chief Minister TR Zeliang na den ajurutepa liasü.
Belgium ya Europe tiyongtsü lir aser India ama sobaliba aser kin temeyoktep lir. Belgium aser India tsüngda IT aser renewable energy atema MoU agitepogo aser Belgium aser Nagaland-ia iba telatetbatem sülen anidaktsü akok, ta Jan Luykx-i ashi.
Putu 19 buba nungi Belgium ya urbanized country ka lir aser onoki yimtitem renlokdaktsütsü aser tayongzükba ajurubatem meteta lir. Onoki iba dak sendakba nung aika ajangshia aruogo aser meteta lir. India kübok tanga state tem nung onoki smart city tem kümdaktsütsü atema inyakdar anungji Kohima nunga asenok külemi inyaktsübaji takoktsü, ta paisa ashi.
Investment and Trade Commissioner, Alexis Flanders-ia o jembidang Nagaland nung lanur entrepreneur temi meranga inyakba angudang kanga pelar ta ashi.
Smart city atema ni Belgium nung yimti kar den osang agiteptsü aser IT sector atema India-i global service provider ka ama inyaktsü koka lir kechiyong India nung ITC wadang nung entrepreneur tajung aika lir, ta Flanders-isa ashi.
Belgium Ambassador-i semdangba ajanga tarutsü anogotem lenmang aika lapoktsü imlar ta Power Advisor, Tovihoto Ayemi-i ashi.
Power department-i Nagaland nung technology tasen tenzüktsü jangrar anungji Ambassador-i iba dak sendakba nung mapa inyaktsü aser Nagaland sorkar o Belgium sorkar yaritepa inyaktsü atema mulunga lir, ta Tovihoto-isa ashi.
Sentong nung IT&C Advisor, Mmhonlumo Kikon-ia Act East Policy indang osang metetdaktsü.
Iba policy ajanga northeast nung maongka aika adoktsü aser nisungtemi shishilembaba nung shilem agitettsü, ta pai ashi.
Urban Development & Municipal Affairs Minister, Metsubo Jamir-ia ashiba agi, Nagaland ya linük nung tangang renlokba state ka lir aser Nagaland nung nütsüng yongsük 97% shi yimtsüng tia nung alir.
Metsubo-isa Belgium Ambassador dang Nagaland den technology tem ajanga yariteptsü mepishia metetdaktsü.
Iba sentong nung mendenji Commissioner & Secretary, IT & C & Power KD Vizo liasü aser Additional Director & HoD, IT & C Er. Tongtiliba Longkumer-i anküp tepela o jembi.