Belgium & Netherland final-i iogo

Hockey World Cup

Bhubaneswar, Luchii/December 15 (Agencies): Tebur Hockey World Cup Küptoknü/Saturday mezüng semi-final asaya nung Olympic nung silver medal anguba telok, Belgium-i England madak goal 6-0 agi takok ngua final tongtetogo. Belgium team-i tang mezüngbuba asayamung ka nung final tongtetogo.
Kalinga Stadium nung semi-final asaya nung World No. 3 Belgium telok nungi asayar Alexander Hendrickx-i (minute 45buba aser 50buba) nung penalty corner ajanga goal ana aser Tom Boon (minute 8buba), Simon Gougnard (minute 19buba), Cedric Charlier (42buba) aser Sebastien Dockier (minute 53buba) nungngeri goal ka ka idakja liasü.
Iba asaya metenzükdang Belgium nungi asayar Gougnard, pa tebu asüba osang angazüka asür nem tetushi agütsütsü asoshi külem asayartemi teka nung armband tanak inoker asaya. First quarter ana tashi Belgium-i England team amokbanger asaya aser goal ana idakja liasü.
Mezüngbuba goal-ji minute 8 buba nung Belgium nungi asayar Florent van Aubel-i yokba ball Tom Boon-i agizüka idakja liasü.
Tanabuba semi-final asaya Australia aser Netherlands na tsüngda asaya liasü. Iba asaya nung Netherlands atema Glenn Schuurman-i minute 9buba aser Seeve van Ass-i minute 20buba nung goal kaka idaktsü. Australia nungi Tim Howard-i minute 45buba nung penalty corner ka ajanga aser Eddie Ockenden-i minute 60buba nung ta goal ka ka idakja asaya goal kasasa nung tembang.
Penalty shoot-off nung Netherlands team-i Austraila madak takok ngua final tongtetogo.