Belgium: Paris lendong atalokdaktsür ta temulung malemer 2 pua lir

Brussels, December 03 (Agencies): Tawa France yimtiba, Paris nung lendong atalokdaktsür rong nung densema alitsü akok ta temulung melemi bilemba nisung 2 pua ayuba osang ka Belgium sorkari tanü Brehostibar nü metetdaktsüogo.

Tan kiralongrar ta bilemer 2 apuji densema, Belgium-i tanü tashi nung Paris lendong den sentakba ken o nung ajemdaker ajak agi nisung 8 tashi apuba osang jangjaogo.

“France senso, arishi küm 20 tain Samir Z-i Morocco-i aoba tayimtsü ka telungi ayaketa atuba mapang taoba Deobar nü Brussels tayimtsü anendak apu,” ta Belgium’er prosecutor-temi tanü metetdaktsü.

Samir-i taküm 2015 tsüngda Syria-i anaben tashi aotsü merangba den külemi, Paris nung peisasa pokseta süa lendong atalokdaktsür, Belgium nung alir, Bilal Hadfi sülen anidaker ka aliba osang angazükogo ta parnoki ashi.

Ano, Brussels kübok Molenbeek district nung ki mita aoba sülen Belgim senso, arishi küm Pierre N-a taoba Deobar nüsa apuba osang jangjaogo.

“Tenaprongla tanü okadaki anir oa tena den sentakba ken o angdangogo,” ta shia, tenati aibelenba kuli mebushitetaka, Samir o Pierre na tajemba agi ita 1 tepuokdak ayutsü ta parnokisa shisem.

Islamic State (IS) teloki taoba November ita 13 nü Paris nung lendong atalokdaktsüba ajanga nisung 130 tashi asüba osang bushitetogo.