Bella den shilem agiba ya konang ama lir: Gigi Hadid

Yimpoksüi/November 09 (Agencies): Victoria’s Secret runway nung aianu Bella den külemi shilem agia jajaba ya kü atema konang ama lir, ta Gigi Hadid-i ashi.
Yangtepnü/Thursday New York City tesem nung lingerie brand indang annual fashion show sentong agiba mapang arishi küm 23 tain Gigi aser la aianü küm 22 tain Bella na külemi runway nung shilem agiba ya tena atema mezüng asütsü.
Iba fashion show sentong nung Gigi-i pink floral top, legging aser boot den külemi runway nung puteptsüsa ‘wings’ melena sübotsü balaka semer shilem agi.
“Atangji nunga runway nung iba amala sübosülemtsü semoker senzüba ya tajangshiba balaka ama lir. Ajisüaka, takdang nung kinungertemi ngua shilem agitetba ya temoatsü ka ama ni züngshir,” ta Gigi-i ashi.
”Victoria Secret (VS) show nung aianü anati mezüng shilem agitetbaji tajangshiba tuluka aser aji aianü Bella küna atema konang lir,” ta Gigi-isa ashi.
E! News den jembiba mapang Gigi-i, ”Iba sentong nung shilem agir tetsür ajak ya ni aser Bella atema aianü ama lir aser aji koda jangratemtsüka,” ta lemsatep.