Bendang linük semdangdang Modi-i PM ama mebenshir: CPI

New Delhi, September 28 (Agencies): Ato kilonser Narendra Modi aija tanü CPI-i, bendang linük nung aliba mapang Narendra Modi-i Ato kilonser ama mebenshir, magizüktettsüsa pai sangdong agütsür aser Parliament den masüdangtepi telemtetba sangdonger, ta ashi.

“Pa bendanglen aliba mapang nung, tang tashi pai nübo ayimer ama reprangteter. Pai RSS ‘pracharak’ mesüra BJP nübo ama masü saka Ato kilonser ka ama benshitsüla,” ta tanü New Delhi nung CPI National Secretary, D Raja-i ashi.

Paisa, Modi-i tanen makai secularism aitsüba kuliji Japan nung nguogo, kong pai Gita kaket ka agütsü, aser Ireland nung kaketshirtemi Sanskrit shlokas atenba, aser tang US nung. Iba ya tanga kecha masü saka India nüngsang yokshiba lir. Iba ya taaktsüka lir,” ta ashi.

CPI lenirisa, “‘Make in India’ nüngtem nung pai investor tem dang India linüki arua sen ajangzüktsü asüngdanger aser parnok dang India market tulu amshitsü asüngdanger. Item ya teimla makai jembiba otem lir,” ta ashi.

‘Digital India’ programme dak sentakba nung Raja-i, “Modi-i India nunger mangdang masü saka America nunger mangdang ang arishir ama reprangteter, kechiyong iba yagi India ya US indang digital colony ka kümdaktsütsü,” ta ashi.