Bendang linüktem nung nütsüng timba aliba linükji India lir: UN

United Nations, November 28 (Agencies): Linük balala nung nütsüng timtiba prokshia aliba linükji India lir; linük balala nung India nunger nütsüng million 17.5 lir, aser bendanglen aliba India nunger ket nungi sen timtiba (US sen billion 78.6) parnoki angu, ta UN migration agency-i metetdaktsü.
International Organisation for Migration (IOM)-i ‘Global Migration Report 2020’ ajanga, 2019 küm tashi nung alima nung bendang linüktem nung oa aliba nütsüngji million 270 lir, aser bendanger timtiba oa aliba tesemji US (million 51) lir, ta metetdaktsü.
“Bendang linüktem nung oa aliba nütsüng shilemji ishikadang (shilem 3.5) lir, kechiyong alima nung nütsüng timtibaka (shilem 96.5) pei asoba linük nung alir,” ta IOM Global Migration Report 2020 ajanga metetdaktsü.
UN agency ajanga ashiba agi, alima nung bendanglen alir nütsüng tesadang shi (141 million) Europe aser North America na nung lir. Item rongnung shilem 52 shi teburtem lir aser bendanglen alir asemsü nungi anasübo mapa bushirtem lir, aser iba nütsüngji million 164 shi lir.
Bendang linük balala nung alir nütsüng timtibaji maneni India nungisa lir. Bendanglen aliba India nunger nütsüngji million 17.5 lir, tanabuba jenjang nung Mexico (11.8 million) aser tasembuba jenjang nung China (10.7 million) lir.
Ano linük telung nungsa nütsüng timtiba tesem balala nung prokshia aliba linükji Syria (million 6.1) lir, iba sülen Colombia (5.8 million) aser Congo (3.1 million) na lir.
Syria nung tesüiba küm 9 jungnüa rara adoka lir, aser refugees timtiba adokba linükji Syria sa lir.