Bendanga agüja inyakba nung süngjang tajung tangdakjang : TR Zeliang

March 9, 2016 nü Police complex, Chumukedima nung Nagaland Chief Minister TR Zeliang den MLA tem aser Naga Yimten Telok balala nungi lennirtem külemi agiba noksa angur.

Dimapur, March 9 (TYO) : Tanü lennirtem dena Naga nungertemi küm aika tenla agüja inyaka aruba Naga Yimten Tebilemtsü asoshi telemtetba ka agitsü atema Naga Yimten Teloktem tsüngda tongtepratep, asalendong aser olemtep maparen talila inyaktsüla ta Nagaland Chief Minister TR Zeliang-i ashi.
Tanü Police Complex, Chumukedima nung Nagaland Legislators’ Forum on Naga Political Issue-i Naga Political Group ajak den Consultative Meeting alidang pai iba tayongzükba agütsü.
“Nenoki bendanga agüja inyakba ajanga asen chirnurtem süngjang tajung tangtsütsü merangtsü. Asenoki asen tanurtem nem yimten tebilemtsü khuret mebenloktsüdi. Naga nunger mapang talangka timtema aruogo aser asenoki nisung ajaki agizüktetba telemtetba ka agitsü merangtsüla” ta TR Zeliang-isa ashi.
“Asenok tsüngda mapang shia asüngdangyaba aser tebilembatem lemsatepba ajanga asenok katika talila angatetteptsü. Iba onük atema asenok tsüngda olemtepba talila nüngdaker” ta Chief Minister-isa shisem.
“Naga yimten tebilemtsü ya telok ka, kin ka mesüra yimten ka indang tebilemtsü masü saka Naga nunger ajak indang tebilemtsü ka lir. Asenok ajak longjemer iba tebilemtsü atema shisa lemsatepa koktettsü merangtsüla. Asenok tsüngda katika aitsütepa melili saka kechi shitak aji tuyur Naga nunger ajak asoshi inyakdi” ta paisa ayongzük.
“Onok sorkar yimsüsürtem India Linük Temzüng kübok tenangzükba agiogo anungji onoki telemtetba agiba inyakyim nung shilem magitettsü. Onoki India sorkar dang iba tebilemtsü atema tebilemba lemsatepba dak alaka mapa meinyaktettsü ta jangjajangja shiogo” ta TR Zeliang-isa ashi.
Nagaland nung yimten telok ajak indang Election Manifesto nung Naga yimten tebilemtsü atema tekaraba nung telemtetba agitsü indang shia lir, saka election tembangba sülen iba onük amadoker. Ajisüaka, ozü sorkari iba onük süoki ia agizük aser yaküm July ita Parliamentary Working Committee-i Prime Minister, Home Minister aser Interlocutor RN Ravi nunger dangi teshimtet telok ka yoka olemteptsü asoshi mapa inyak. Taoba ita PWC-isa linük nung yimten lennirtem den ajurutepogo aser Naga nunger ajaki agizüktettsüsa telemtetba ka agitsü atema Parliament nung nungittsü mepishiogo, ta TR Zeliang-isa shisem.
Prime Minister Narendra Modi lenisüba kübok India sorkari Naga khuret koktettsü atema mapa inyaker ta tamang akar. Taoba Interlocutor inyakertem Padmanabhaiah aser RS Pandey na dangbo Interlocutor RN Ravi dak ang Prime Minister-i temulung tali alemer, paisa metetdaktsü.
Tanü amenba senden nung NNC Adino group, NSCN Kholi/ Kitovi aser NSCN Reformation teloktem medeni NNC telok asem nungi teshimtet lennirtem aden.