Bendanger 30,000 ISIS nung adentsü atema Syria aser Iraq-i ogo

New York, September 27 (Agencies): 2011 küm nungi tenzüka tang tashi nung Islamic State (IS) kiralongrar telok nung adentsü atema America nungi 250 densema bendanger nisung 30,000 shi Iraq aser Syria linüki ogo, ta osang ka ajanga ashi.
Tesüiba ita 12 tsüngda IS nung adentsü aortem kanga züinogo, aser iba ya ajanga alima linüktemi arrtsü mitba, Intelligence osang lemsatepba aser kiralongraba anema agiba meratem ajanga kiralongrar telok nung adentsü atema aor tasenpurtem menokdangtetba kuli sayur, ta New York Times osang ajanga ashi.
Iraq mesüra Syria-i oa kiralongrar telok nung adener America nunger küm ka tsüngda anasü agi tali küma nisung 100 nungi 250 jungogo, ta intelligence aser law enforcement ketdangsertem osang nung ajemdaker kasa osang ajanga ashi.
American intelligence asadangertemi asadangtetba agi, 2013 küm nungi tang tashi nung linük 100 nungi tema nungi bendanger 30,000 jungnüa IS nung adentsü atema Iraq aser Syria nati ogo, ta osang ajanga ashi.
Pentagon osang ajanga ashiba agi, linük telokteptemi anüng nungi amakdang IS kiralongrar 10,000 shi tepsetogo, ajisüaka iba telok züngsem ajema makümer, kechiyong ita shia züngsem 1000 shi iba telok nung adener, ta kasa osang ajanga ashi.