Bendanger tepsetba agi Bangladesh tensa tamajungba mekümdaktsütettsü: Hasina

Dhaka, October 07 (Agencies): Bangladesh linük nung bendangertem tepsetba agi Bangladesh tensa tamajungba mekümdaktsütettsü ta Bangladesh Ato Kilonser, Sheikh Hasina-i tanü Bodbar nü metetdaktsüogo.
“Ozü Bangladesh linük indang tensa mejungi kümdaktsütsü nükjidong nung tawa bendanger 2 tashi Dhaka yimti nung tepset,” ta shia, Bangladesh nüng menüktsütsü nükjidong nung Bangladesh-i langka tajung inyaktetba shia tan amala lendong balala atalokdaktsür ta lai ashi.
Mejangjatetba prangpong abener nisung kari Italy nunger Cesare Tavella Dhaka yimti nung taoba September ita 28 nü kasetba sülen anogo 4 süir Japan nunger Kunio Hoshi Rangpur yimti nung kaseta lendong atalokdaktsüba osang bushiteta lir.
“Ozü linük tensa tamajungba kümdaktsütsü nükjidong nung ozüng alema maparen balala inyakaka, yamaji inyakba agi ozü linük nung tensa tamajungba mekümtsütettsü,” ta Hasina-i nenshia ashi.
Dhaka kübok Mirpur Cantonment nung Defence Services Command aser Staff College na atema renemba academic building tasenba, Sheikh Hasina Complex lapoktsüba sentong nung tanü shilem agidang Hasina-i iba olenji metetdaktsü.
Ano külen, Tavella tepsetba ken o nung police-i tanü tashi nisung shinga pua mali saka parnoki Hoshi tepseter ta temulung melemi bilemba nisung 2 tashi tang pua aliba osang jangjaogo.