Bendanglen aliba rongsen osang bushitsü Bank tem temeten mali: Mallya

New Delhi, April 21 (Agencies): Brihostibarnü shishilembar tetsüdi, Vijay Mallya-i, pa bendang linük balala nung aliba kiojen aser rongsen aliba osang tejangja bushitsü bank tem dak temeten mali, ta ashi.

Bank tem dang sen apuba sentsüh motetba atema Mallya anema ken o benoka lir aser pai pa kiojen aser rongsen osang June 26 nü agütsütsü atema Supreme Court dang temelaba meshia liasü.

Supreme Court nem telangzüba agüja Mallya-i, pa nem sen aputsüdang bank temi pa bendanglen aliba rongsen osang memeshi, ta ashi.

Supreme Court-i Mallya dang April 21 nü tashi nung bendanglen pa aser par kibong indang kiojen aser rongsen osang agüjang ta tuyua lir. Supreme Court-isa pa dang, pai kodang court matsüngdangi arutettsü ta asüdanga liasü.

Enforcement Directorate (ED)-i External Affairs ministry (MEA) dang, IDBI dang sentsüh crore 900 aliba ken o nung Vijay Mallya linüki anir arutsü mepishiogo.

Enforcement Directorate-isa MEA dang shidi ka ajanga Rajya Sabha MP, Mallya aputsü atema pa anema Interpol red corner notice (RCN) agütsütsü atema mepishiogo iba den külemi aser parnokisa CBI danga shidi ka ajanga kasa temepishiba agütsütsü.