Bendanglen jenoka alir Tibet nüburtemi par Prime Minister shimtsü election agir

Dharamsala, March 20 (Agencies): Pei talidak toktsür alima tesem balala nung jenoka alir Tibet nüburtemi India kübok Dharamsala nung tentetba Tibet sorkar ‘Sikong’ ta ajaba Ato Kilonser aser parliament züngsemtem shimtsü election tanü, Deobar nü agiogo.
Ato Kilonser menden asoshi tenüng benokba candidate, Lobsang Sangay aser Tibetan parliament speaker, Penpa Tsering na rong nung ka Ato Kilonser shimtsü nükjidong nung Tibet nüburtemi pei tamak sentsü aketba voter identity card bener Dharamsala nung tentetba polling station 9 tashi nung par vote ajenokja liasü.
“Tibet nüburtemi agiba election sentong tendanga reprangshitsü nükjidong nung European Parliament züngsemtemi tentetba bendanger telok kati Dharamsala tonga lir,” ta Central Tibetan Administration (CTA) nung press officer, Jamphel Shonu-ia metetdaktsü.
Vote agütsürtemi pei vote agüja candidate 94 nungi parliament yimsüsür 45 tashi shimtsü aser tan election nung takok angur yimsüsür tenüng tarensenji taruba April ita 27 nü alima dang sangoktsütsü.
Ajisüaka, Tibet nunger tanülar lenisang, Dalai Lama-ibo vote agütsür ka ama election nung shilem magitsü.
US, Japan, Russia, Austalia aser Europe nunger densema, alima tesem balala nung Tibet  Ato Kilonser tasenba aser parliament yimsüsürtem shimtsü election agiba sentongtem nung Tibet nunger nisung 90,000 dak temai shilem agiba osanga jangjaogo.
Iba election sentong ya India nunga Darjeeling, Bylakuppe, Dehradun aser Delhi nunger nung agiba osang jangjaogo.
Yaküm, 2015 küm agiba preliminary round election sentong nunga alima tesem balala nung alir Tibet nunger nisung 47,105 tashi shilem agiba osang bushitetogo.
Tang Tibet Ato Kilonser menden abensang, Sangay’er küm 5 yimsüsütsüren kümzük taküm August ita tembangtsü.