Bendanglen jenoktsü meranger 200 shi tzüyim nung süogo

Libya anülulentip tsütsü tzüyimkümlen tentetba Zuwara yimti anasa tzüyim nung rong tsükokdang asüba nisung tasümang ishika tasümang asepba yangko agi sepbanger noksa nung angur. (Zuwara, August 28)

 Tripoli, August 28 (Agencies): Pei linük toktsür bendang linük balala nung jenoka alitsü merangba nisungtem aniba rong kati Libya toktsür Italy bushia aodang rongji tzüyim nung tsükoka lendong atalokba osang jangjaogo.

“Bendanglen jenoktsü merangba nisungtem aniba rongji Libya anülulentip tsütsü tzüyimkümlen tentetba Zuwara yimti anasa tzüyim nung tsükokba sülen nisung 200 shi asüba osang tang tashi nung jangjaogo,” ta Libya sorkar ketdangser, Ibrahim al-Attoushi-i tanü Hokolbar nü metetdaktsü.

Zuwara yimti ya ozüng alema nisung shibelenertem indang tesep tajung ka aliba osang bushiteta lir.

Ketdangsertemisa ashiba agi, tan atalokba lendong nung densemer nisung 200 shi Libya’er tzüyim sepaitemi tzüyim nungi kümzüka anitetba osang jangjaogo.

Tan lendong nung densemer timba ka sub-Saharan Africa, Pakistan, Syria, Morocco aser Bangladesh sensotem aliba osanga jangjaogo ta parnoki metetdaktsü.

Taküm 2015 küm tenzüker tanü tashi nung pei linük toktsür Europe kübok densemba linük balala nung jenoka alitsü meranger ishiba agi nisung 2,400 shi tzüyim nung asüba osang bushiteta lir.