Bendanglen nungi ‘academicians’ 400 jaoka India nung sayudaktsütsü : Mukherjee

New Delhi, February 23 (Agencies):Linük Tir Pranab Mukherjee-i, bendanglen nungi ‘academicians’ 400 jaoka India nung tesayuba agütsüdaktsütsü, ta Mongulbarnü metetdaktsüogo.

“Bendanglen tesayurtem aser India nung kaketshirtem tsüngda kanga junga angatettepba sensak asemba tsütsü tali tajungba akümtsü asoshi kü sorkari mezüng telemsa nung bendanglen nungi academicians 400 jaoka India nung sayudaktsütsü,” ta ashi.

Pai iba osang ya budget session tenzükba mapang parliament nung Rajya Sabha aser Lok Sabha naprong mena lia o jembidang metetdaktsü.

Pai, Indian Institutes of Technology (IITs) ana, Indian Institutes of Management (IIMs) trok, Indian Institute of Science Education & Research ka aser National Institute of Technology ka indang inyakyim joko tenzükogo, ta shisem.

Mukherjee-i, ‘Imprint India’ sentong lapokba ajanga nüngdakba scientific inyakyim ter tashi jangjaogo aser item rongnung bushisüngdangba aser taküm aliba yimyatem densema lir, ta ashi.

“Sorkari tashi agüja Imprint India sentong ajanga bushisüngdang agiogo aser iba mapang scientific tsütsü nüngdakba teiyaktsü tapu 10 tashi ngutetogo,” ta pai ashi.

“Shisatsü talila bushiloknertem asoshi National Institutional Ranking Framework lapoktsüogo. National Scholarship Portal ajanga shisashirtem nem scholarships agütsüba tsütsü sabang lapoktsüogo,” ta paisa shisem.