Bendenba aser agütsüba (T.Ken 84:1-12)

“Aser kuli aika rongnung kü dang nungi nai kechi angashi ajisa ano tangar tesayutsü akokba aser temulung lemtetba nisungtem nunga nunglokjang.” (2 Tim. 2:2).
Sayutsüngir aikati ashir, “Ni nisungi Lai ratettsüba kecha Lai bushiba nung teyari mangur saka Tsüngrem nungi dang indang indanga angazüker.” Ibai tangatsü tanelaren ama saka ibai Lai tesayuba masü. Pauli Timoti dang nendaka azüngtsü ajungshi (1 Tim. 4:13). “Kechiyong putir tebang mechi nung temetetba shisatsü yua alitsüla, aser pa tebang nung parnoki ozüng bushitsüla, kechiyong pa temeranger Kibuba osang abener lir” (Malaki 2:7). Arogo nung tangatetba nung aintsü asoshi Tsüngremi tesayurtem yutsü (Ef. 4:11). Tesayurtemji angashitsü aser azüngtsü akok. Tesüiba tesayurtem mesüra alinük balaka nung alirtem nungi ajangzüktsübaji parnoki zülubatem azüngbaji dang lir. Sayutsüngirtem Lai ratet azüngtsüla aser Lai bushitsüla. Aji inyaktsü shingai na menokdangtsü. Takok tashi züngang. Nüburi na nungi angashiba shia tangazükba tasen angazüktsü. Ainlen jajadang azüngtsübaji tajangzük lir. Nai azüngba nungi kechi angazük aji nai sayutsüngiba sabang nungi agütsütsü akok. Mebendenra tagütsütsü makatsü.
Sarasademji Lai bushiba den kasa tongtipang lir. Tenzükba nung takok angutsü miim tashi asem lir: Sarasadem, Sarasadem aser Sarasadem. Ibai tekolok tashia ajanga masü mesüra sen tashi ajangaka masü, saka Tsüngrem Tanela ajanga shidakba tenzükeri Tsüngrem mapa ataloktsür. Ibai Tanela nung tenzüker shi nung atemtsüa takoktsü lir. Yisui küm asem sür tesadang nung mapa inyakdang Pa taküm nung sarasademji kodanga mezütok. Sarasadema tenzükba nung teti teronem tanang lir. Asenoki sarasadema tenzükba mapaji metenzükra tatem nung asenok chireptsü. Sarasademi asen khuret Yisu khu tepungpa den melenteper (Mt. 11:28-30).
Leonard Ravenhilli (1907-1994) minister shibai sarasadem masür pa nemzüa aor. Angazükbaji tongtipang saka timtem agibaji tongtipangba. Sayutsüngir lendongji pai tangar dang sarasademtsütsü asüngdanger saka pa kija sarasadem masür. Shirnoki Kibuba dang ataa alir parnok tashi tasen angutsü: mongzütem ama tashikang agi atutsü! (Isa. 40:31). Tsüngrem asoshi tali inyaktsü Tsüngrem den tali alitsüla. Sarasadem nung tashi maitba taküm sabang nung temeimtsü minister akümtsü. Sarasadem tali tashi tali, sarasadem tera tashi tila; sarasadem makaba tetezü ain mali!