Bengal nung Cong, BJP aser CPI(M) longjemogo: Mamata

Kolkata, August 28 (Agencies): West Bengal nung mepetmesü adokdaktsütsü asoshi Congress, BJP aser CPI(M) party tem ka küma longjemogo ta aija tanü state Chief Minister Mamata Banerjee-i Centre sorkar dang, parnok mapatem reprangdangang aser parnoki nangzüka alibatem mataloktsütetba tamakokji reprangdangang, ta ashi.

“Tang Centre nung tashi aliba BJP dang ni ya shiner, nenoki khuret abenba temaitsü karbo sayutsüla. Kü kijai dang (state sorkar) khuret abentsüla saka nenokibo (Centre sorkar) khuret kata mabentsüla ta mali,” ta Bengal CM Mamata-i ashi.

“Nenok Centre sorkar reprangdangang, aser nenoki inyaktettsüsa aliba mapatem aser nenoki mataloktsütetba tamakok mapatem meyipa reprangdangtsüla. Yimtenren aser election nung takok anguba temaitsüji tamangba lokti tsüngda rara adokdaktsütsü atema asü (?) Tamangba lokti tsüngda raratsü asoshi Bengal nungbo tesem mali,” ta tanü Kolkata nung lokti senden tulu ka nung jembidang Chief minister-i ashi.

State nung mepetmesü adokdaktsütsü asoshi CPI(M), Congress aser BJP party tem ka küma longjemogo, ta lai aitsü.

Ano tesem kar nungbo parnok longjemer election nung tokteptsü asoshi parnok bangjemtepogo, ta laisa shisem.

“Iba ya tazüngla teloktep ka lir aser parnoki Bengal ainba nokdangtsü merangba asoshi nüburtemi parnok dang tansütsü ka sayutsü,” ta lai ashi.