Bengal nung dengue agi nisung 14 süogo

Kolkata, August 9 (Agencies) : West Bengal nung tang tashi nung dengue tashidak agi nisung 14 süogo, ta Mongulbarnü Health Department ketdangser kati metetdaktsü.
“Tesüiba gondha 48 tsüngda nung dengue agi shiranger nisung 150 putetsemogo aser parnok ya densema January ita nung tang tashi nung kasa tashidak agi shiranger parnok nisung 1,742 kümogo,” ta Health Services Director Biswaranjan Satpathy-i ashi.
Iba shirang agi tesüsa asübaji July 4, 2016 nü liasü ajisüaka August 9, 2016 nü ang dengue agi asü, ta osang tejangja ngutetogo.
Pei lemzükba mapang shitak meinyakba atema Kolkata Municipal Corporation (KMC)-i doctor ana dena mozü kidang inyaker parnok nisung 32 nem ozüng agütsüogo.
KMC Mayor-in-Council, Health, Atin Ghosh-i, dengue prokshia aoba anendaktsütsü mechi KMC-i yimti nung plastic marok amshiba nokdangtsü, kechiba süra item marok yagi kilentsü nokdanger aser tzü atsüngtena yangji merla poktetdaktsür, ta ashi.