Bengal nüngja melentsü atema Assembly nung bangzüng ka agizük

Kolkata, August 29 (Agencies): Tanü West Bengal state Assembly nung state nüngja,  West Bengal agi Bengali oshi nung ‘Bangla’ aser English oshi nung ‘Bengal’ ta melentsü atema bangzüng ka agizükogo.
Ajisüaka opposition Congress, BJP aser Left Front party temibo ibaji anema nokdaker.
Iba bangzüng benokdang state Parliamentary Affairs minister, Partha Chatterjee-i, state nüngjaji Bengali oshi nung ‘Bangla’, English oshi nung ‘Bengal’ aser Hindi oshi nung ‘Bangal’ asütsü, ta metetdaktsü.
Ibaji pusema jembidang state Chief Minister, Mamata Banerjee-i, “Bangla ji akhi otsü aser sobaliba den sendaka lir. ‘Bango’ ta aja nunga ni mashishir. Ajisüaka nisung aikati ‘Bangla’ aginer. Kidanger linük Bangladesh den maiteptsü atema English nungbo ‘Bengal’ ta asütsü,” ta ashi.
Trinamool Congress tongti, Mamata-isa, “Kodangsa asenok India adena odir mesüra tanga state kari odir asenok ya Bengal nungi ta agizüker. 2011 küm nunga onoki state nüngja melentsü atema benok, saka Centre sorkari nokdanga liasü. Iba dak sendakba nung telemtetba agia mali. Anungji maneni state nüngja Bangla ta melentsü atema onoki telemtetba agiogo,” ta ashi.
Tesülen osangbenertem den jembidang Banerjee-i, “Yimtenren atema shirnoki nüngja melentsü ya anema nokdaker, parnoki aaktsüla. Iba ya putiotsü nung aibelen ka aser putiotsü ajanga parnok dang tai matoktsü,” ta ashi.
Laisa, ibaji maneni Central sorkar matsüngdang benoktsü, iba sülen Parliament nung benoktsü, ta metetdaktsü.
“Ibaji Parliament nung benoktsü atema ni Centre sorkar dang mepishitsü. Onoki ibaji tekaraba nung inyakner,” ta lia ashi.
Tawa State BJP Tir aser MLA, Dilip Ghosh-i, ibaji agizüktsü atema pai memelatsü ta jembiba dak sentakba nung Banerjee-i, “Pai koma ka nokdangtetdir ni repranga atatsü. Ni Union home minister den jembitsü. Ibaji nokdangtsüsa paji (Dilip Ghosh) shiba?” ta ashi.
“Ni pa (Rajnath) dang iba bangzüngji Assembly nung agizükogo ta shiogo,” ta lai ashi.
Ano külen Left Front legislative party lenir, Sujan Chakraborty-ibo, ibaji lemtettsü atema party ajak senden ka akatsüla, ta ashi.
“Onoki nüngja tasen ‘Bangla’ ji mashishir, ajisüaka kodaser state ka tenüng asem tashi alitsü- Bengali oshi nung ka, English nung ka aser Hindi oshi nung ka. Iba atema telemtetba agitsü asoshi party ajak senden ka alitsü nüngdak,” ta Chakraborty-i ashi.