Bengali sangro zülur, Sen-i Sahitya Akademi award meyipa agütsüogo

Kolkata, October 14 (Agencies): Bodhbar nü Bengali sangro zülur nüngtugu, Mandakranta Sen-i lokti nung mepetmesü aser communalism anema lungkak aita lai anguba Sahitya Akademi Young Writers Special Award meyipa agütsüogo.

Sen-i Bengali sangro zülubatem ajanga 2004 küm iba award ngua liasü.

Lai, Uttar Pradesh nung Muslim nunger tebur kati nashi shi achi ta olulu nung ajemdaker tepsetba aser linük nung kaketzülur tepsetba kuli ajanga iba award meyipa agütsütsü telemtetba agi, ta ashi.

Tawa UP nung Mohammed Akhlaq tespsetba aser linük nung ochi ola adokertem tepsetba sülen item tatalokba anema kaketzülur 20 dak temai award meyipa agütsüogo.

Yashi-a Punjabi kaketzülur, Ajmer Singh Aulakh-i Sahitya Akademi award meyipa agüja liasü.

“Kaketzülurtem tangatetba ola nokdangtsü atema amakba aser tepsetba ajanga ni Sahitya Akademi Award meyipa agütsür,” ta pai ashi.

Aulakh-isa, “Tawa Dadri nung nashi tepset, ta olulu nung ajemdaker tebur ka tepsetba ser kaketzülur, M M Kalburgi tepsetba onük nung Ato kilonseri ola madokba anema ni iba award meyipa agütsür,” ta ashi.

BJP tashii aruba sülen nungi item tatalokbatem ya timba akümer, ta paisa shiogo.