Bengaluru anasa bus toutak nung tetsür ka taküm raksatsü

Bengaluru, November 06 (Agencies): Bengaluru anüdoklen tsütsü tezülen Hoskote nung bus toutak nung gari anisang jagi arishi küm 19 nurse ka tashiyim amshia raksatsüogo, ta Hokolbar nü police-i ashi.
“Brihostibar aonung la kija bus nung lia gari anisangi tashiyim amshia la raksatsüba ken o lai benokba sülen onoki gari anisang arishi küm 26 Ravi aser pa den yaritepsang Manjunath (23) puogo,” ta Bengaluru Rural Additional Superintendent of Police, SR Ramesh-i ashi.
Yimti tiyong nungi kilometer 30 shi pilar aliba Hoskote nung nursing home ka nung inyaker nurse ji mapai aotsü atema Sulibele nung bus kati atuba sülen ibaji atalok.
“Tai tonglokja alisang jagi pa den yaritepsang dang bus ji aniang ta ashi aser pai la tashiyim amshia raksatsüba sülen Nagagondanahalli nung lenmang tezülen la anizüka toktsü. Nija hospital nung aliba doctor tem dang lai iba tatalokbaji ashiba sülen lai ken o agütsütsü atema police jaok,” ta Ramesh-i ashi.
Lai ken o agütsüba nung ajemdaker police-i nisung anapronglaji puogo aser Andhra Pradesh nung registration agia aliba bus jia pua yuogo.
Iba bus ji süoshi factory nung inyakertem atema lir aser parnok rongnung tetsürtem timba lir. Factory nungji inyaker tetsür karibo bus anisang jagi parnok dak-a tim mesüi benshiogo, ta ashi.
Iba dak sentakba nung Home minister, G Parameshwara-i state nung police station ajak nung bus anirtem, yaritepertem aser nija public transport garitem amshirr tenüng ajak züluoka ayutsü tuyuogo.
October 3, 2015 aonunga Bengaluru southeast nung van ka nung gari anisang aser pa den yaritepsang nati arishi küm 23 tetsür ka tashiyim amshia taküm raksaja liasü.