Bengaluru FC-i 2 buba I-League takok marok agizüktsü jenjang angur

Bengaluru, April 18 (Agencies): Bengaluru FC teloki goal 2-0 agi Salgocar telok madak league asaya koka I-League football asayamong takok marok agizüktsüsa temaba jenjang yashi, Deobar nü nguogo.
Bengaluru teloki küm 3 tsüngda nung tan agi takok marok tanabuba agizüktsü jenjang angur lir.
Yashi asaya nung Eugenson Lyngdoh aser Seminlen Doungel nati minute 8 aser 87 buba na nung goal kaka agüja par Bengaluru telok nem takok nugdaktsü.
Bengaluru teloki 2013-14 takok marok mezüngsüa agizükba sülen 2014-15 asayamong nunga Mohun Bagan telok sülen anidaka tanabuba jenjang ngua liasü.
Tan asaya akokba sülen Bengaluru teloki asaya 15  nungi ajak agi points 32 ajangzüka asaya 15 nungi points 27 ajangzüker Bagan telok den points 5 agi temaba jenjang ngua lir.
Aji oda, points 5 agi temaba jenjang nguadokba yong, Bengaluru teloki tan April ita 23 nü Siliguri nung asayatsü ayongba tatembangba league asaya nung Bagan telok mekoktetaka, par teloki I-League asayamong takok marok agizüktsüsa jenjang angur lir.
Ajisüaka, iba asayaji tongtipang asaya ka alitsü kechiyong iba asaya nung takok angu nung dang asaya 15 nungi points 25 ajangzüka tang tasembuba jenjang nung alir, East Bengal telok den temaba jenjang ngua, Bagan teloki tanabuba jenjang angutsü.
Bagan teloki tamakok anguba den külemi, par teloki Shillong Lajong den tan April ita 24 nü asayaba asaya kokra, East Bengal teloki tan asayamong nung tanabuba jenjang angutsü.