Bengaluru FC-i mapang tatsüka atema Alex Barrera aniokogo

Bengaluru, Metsüremi/March 02 (Agencies): Bengaluru FC-i midfielder Alejandro ‘lex’ Barrera Garca aniokogo, ta Indian Super League club ajanga Honibarnü sangdong.
Arishi küm 27 tain midfielder ya mapang tatsüka atema tan season tatem tashi asayatsü aser pa ya Australia nunger Erik Paartalu melen shibaba lir, shiba February 9 nü Chennaiyin FC den asayadang yiruba sülen asaya ka nunga shilem magiteter arudagi.
“Iba season atema tongtibang asayatem anünga lia Erik Paartalu shilem magitettsüsa akümba ya club atema takoksa tulu. Asen midfield nung pai tongtibang shilem agia liasü aser pa dak asayar takoker ka dak aketba jakla aliba ajanga asaya tasak nung yaria arua liasü. Saka asenoki tensa angateta tajungtiba nung asayayonga aotsüla,” ta Bengaluru FC indang head coach Carles Cuadrat-i ashi.
“Alex ya mapang tatsüka atema dang lir, shibai asaya aika nung shilem agidanga lir. Home nung asayatsü mapang pai asenok yaritsü ta onoki pa dak tamang akar,” ta Cuadrat-isa ashi.
Alex ya tang mezüngbuba Spain ajanga orr asayatsü lir aser pai Bengaluru FC nung asayatsü maongka anguba atema kanga pela bilemer, ta ashi.
“Ni India-i marudang teti football asaya liasü, ni temang anema lir aser tekeratiba nung ni asayaba moabu nung ia asayaner. Ni team den külemi mera agiyonga oner aser asayartem den tekeraba nung sadoksayima asayaner,” ta Barrera-i Bengaluru FC nungi asayatsü asoshi maparen ajunga tembangba sülen osangbener dang ashi.
Bengaluru FC nung tang season atema Barrera yagi Spain nunger trokbuba alitsü, aser par linük nungi külem asayartem aliba ajanga play-off tem asayatsü lia yimyatem ajunga angazüktsü imlar.