Bengaluru FC puri Winger Antonio Dovale aniokogo

July 17, 2017 (Agencies): 2017-18 season atema Bengaluru FC puri Spain nunger winger Antonio Rodriguez Dovale aniokogo.
“Antonio ya tasa tajung aketba lanur asayar ka lir. Spain nung jenjang temaba nung asayar ka ama pai tajangshiba tajung bener aruba ajanga onok iba season nung teyari agütsütsü. Pai maneni tajungba kümner aser angazüktsü asoshi tejangraba aliba ajanga pa nem teyari agütsütsü,” ta BFC head coach Albert Roca-i ashi.
Arishi küm 27 asayar shiba dang ‘Toni’ ta ajar pa Spanish Segunda Division nungi Rayo Vallecano club nung asayaa liasü aser tang BFC nung denogo.
Dovale ya Juanan Gonzalez aser Dimas Delgado sülen BFC nung Spain nunger asayar tasembuba lir.
Dovale ya Northern Spain kübok A Corua nung aso aser pa yina atuba mapang Obradoiro aser FC Barcelona nungi asayaa arur 2015 nung Celta de Vigo nung aden.
Küm ana lir külen pa reserve side-i aniket aser aser 2009 küm Segunda Division nung mezüngbuba asaya liasü.
Pa BFC den küm ka atema denogo.
“Ni kü career nung jenjang tasen ka agitsü asoshi kanga jangra atemer. Ni club tulu ka den adener aser iba season atema training agia onok nükjidong tongteta aotsü asoshi matateter. Ni professional asayar ka ama tajangshiba aika ajangashiogo aser kü career nung iba ya jenjang tasen ka asütsü koba kanga tongtibang lir,” ta pai ashi.