Bengaluru nung David Guetta concert thiogo

New Delhi, January 12 (Agencies): France nunger nüngtugu DJ, David Guetta concert Bengaluru nung taonung agitsü aliba thiogo. Osang ka ajanga ashiba agi yimti nung December 31 aonung tetsür dak tim mesüi inyakba tatalokbatem aika ajanga iba sentong thinener.
“Guetta4Good” nüngja agütsür iba concert ya nüngdakbapur nem teyari agütsütsü asoshi Bengaluru, Mumbai, Hyderabad aser New Delhi nung akatsü sentong liasü.
“New Year mapang Bengaluru nung lendong atalokba sülen yimti nung tang tensa mejungi aliba ajanga iba concert thinena atatsü asoshi ketdangsertemi shia liasü. Onoki iba concert akatsü asoshi maparen balala aika inyakogo saka ketdangsertemi memelunger. Anungji tanü akatsü aliba concert athir,” ta iba sentong ayonger Sunburn nung CEO, Karan Singh-i metetdaktsü.
Yimti ketdangser aser Guetta-i melungra iba sentong ayonger teloki iba sentong agishitsü asoshi imlar, saka iba osang züluba mapang tashi nung osang tejangja agüja mali.
Saka police ketdangser kati ashiba agi, yimti tensa mechi masü saka yimti nung Agricultural Product Marketing Committee (APMC) atema election aliba ajanga tanüker nüngdaker aser iba concert ayongertemi January 10 nung ang parnok dang teyari meshia liasü.
Bengaluru nung M G Road-Brigade Road tesem nung New Year mapang nisung ajaki ngua lia tetsürtem dak tashiyim agi mapa tamajung inyaktsü merangba ajanga linük ajungai aija liasü. New Year benjung amongba mapang yimti nung lendong mataloktsü mechi police 1,500 liaka mejangjaba nisungtemi tetsürtem aika dak tashiyim amshia mapa tamajung inyaktsü meranga, o tamajung shia liasü.
Küm 49 tain DJ ya Bengaluru nungi tenzüka Mumbai, Hyderabad aser New Delhi yimtitem sema concert agüja senzütsü sentong liasü.
“Yimti nung tensa mejungi mali. Anungji onoki tayonger dang nungi tejangja kuli meshitsü,” ta IGP (Central Range), Seemant Kumar Singh-i metetdakja liasü.
Guetta ya India nung kanga nüngtugu lir aser pai tesüsa India nung concert agütsübaji 2012 nung liasü.
“Mumbai, New Delhi aser Hyderabad yimtitem nungbo renema aliba ama akatsü,” ta Karan Singh-i osangbener den jembidang metetdaktsü.