Bengaluru nung IPL 2016 final asayatsü akok

Mumbai, April 15 (Agencies): Bombay High Court (HC)-i tang tasayadak Indian Premier League (IPL) cricket asayamong asayatem Maharashtra nung masayatsü tuyuba sülen iba asayamong indang final asaya Bengaluru nung asayatsü asoshi sentong renemba osang angazükogo.
IPL 2016 indang 1 buba qualifier aser final asaya Bengaluru nung asayatsü aser tanabuba qualifier asaya Kolkata nung asayatsü asoshi IPL Governing Council nung mendenbuba, Rajeev Shukla-i onük benoka lir.
Ajisüaka, IPL Governing Council-i onük ajunga angadangba sülen ang tatembangba telemtetbabo agitsü.
Ano külen, Maharasthra nung asayatsü lemzükba telok, Mumbai Indians aser Rising Pune Supergiants telok na nem Raipur, Visakhapatnam, Kanpur aser Jaipur rong nungi asayadak shimtsü asoshi IPL ketdangsertemi metetdaktsü aser Pune teloki Visakhapatnam nung par tanüngba asaya asayatsü jangraba olen metetdaktsüogo.
Ajisüaka, Mumbai telokibo par asayadak shimba osang tan April ita 17 nü sülen ang sangdongtsü metetdaktsütsüogo.
“Pune aser Mumbai nati par asayadak shimba osangji Governing Council nung benoktsü aser telok anati aginüba ama asayadakji lemzüktsütsü,” ta Sukla-isa metetdaktsüogo.
Maharashtra nung tajemtsü tzü peria mongui timatemba yong tan April ita 30 nü sülenbo Maharashtra nung tanüngba IPL asayatem masayatsü asoshi Bombay HC-i BCCI dang tan Bodbar nü tuyua liasü.
Maharashtra kübok Mumbai, Pune aser Nagpur nunger nung IPL asaya 13 tashi asayatsü asoshi renema liasü saka asayadakji joko melenshitsüsa akümer lir.
“IPL ama asayamong ayonga agitsüji kanga dang tasak lir aser iba yongji asayadak tasen melenshitsüji khuret tulu lir,” ta Sukla-i sangoktsü.
“Maharashtra nung IPL masayaba ajanga Maharasthra sorkari sen crore 100 shi takoksa angutsü,” ta BCCI Secretary, Anurag Thakur-ia tawa metetdaktsüogo.