Bengaluru nung Khristan sentong ka agitsü aliba athi

Bengaluru, April 9 (Agencies): Bengaluru nung tashiyim amshia tamangba yimsü melendaktsür ta ken o benokba ajanga Honibar nungi Khristan sarasadem sentong agi agitsü aliba thiogo.
Iba sentong nung America nunger sayutsüngir ana adentsüba liasü saka ghonda 12 shi ka lia iba sentong athitsüsa aküm.
Sentongji Honibar aser Deobar anogotem agitsüba liasü aser nisunga 1,000 shi jungnüa adentsüba liasü saka Hindutva telok- Bajrang Dal-i ken o benokba ajanga sentongji athi.
Uttar Pradesh nunga Maharajganj district nung Hindu Yuva Vahini-i ken o ka benokba ajanga kasa sarasadem sentong ka tagidak nung anentsüsa aküm.
Hindu Yuva Vahini ya tang UP Chief Minister Yogi Adityanath-i tenzükba lir aser Khristan tamangertem sentong nung tashiyim agi tamangba yimsü melendaktsür ta tai tongloktsüba agi magidaktsü saka tai tongloktsüba kulitemji tiyazü liasü.
Bengaluru nung Hokolbar anüngdang Girish Bhardwaj ta ser nisung kati Foreigners’ Regional Registration Office tsüngdang America nunger evangelist ana India nung tamangba yimsü melendaktsütsü atema arua lir ta ken o ka benok.
Tena indang visa telatetba anema iba mapa ya inyaker ta Girish-isa ashi.
“Bendanger ana jagi tamangba yimsü sentong nung adentsü atema dang Indian visa meshi saka tenati Indian Consulate dang tiyazü shia mapa tanga inyaker” ta paisa ken o benokba nung shia lir.
Iba sülen Bajrang Dal convenor, Keshav Nayak-ia police tsüngdang ken o ka benok aser iba nung, “tai maketba Hindu nunger temulung meyipdaktsütsü atema sentong ayong. Parnoki kanga dang temulung ulua yimjak nung tamangba yimsü melendaktsütsü indang sentong agitsü ayongzük. Iba ajanga Hindu nunger temulung yirutsür” ta zülua liasü.
Keshav-isa sentong ayongertem aputsü aser ozüng tapet agi merenshitsü takhangba agütsü.
Osangbenertemi tayonger dang asüngdangdang, “onoki iba arogo nung mapang shia retreat aser sentongtem agiyonga arur. Iba sentong ya-a arogo züngsemtem atema dang ayongzük. Temelaba magiba indang onük kechiba jembir’ar onoki ratar. Onoki nisung shinga temulung memeyipdaktsür, Khristantem dang sentong nung adener” ta arogo lennir kati langzü.
Iba sentong nung adentsüpurtem dang sen noklangka (100) taa meshir aser sentong indang poster tem nung sen mesüra sempet agütsütsü indang kecha shia mali.
Iba ashishitep ken o nung police ketdangsertemi o kecha balaka mashi aser parnoki nisung shinga danga sentong athitsü atema tetuyuba magütsü ta ashi.
“Visa anema mapa inyakba lira, ibaji onoki bushitsü, saka sentong nung Khristan masürtem shinga madener süra, tamangba yimsü melendaktsüba onük kong lir? Ibajia parnok indang tenlaki nung aliba auditorium nung agiba sentong ka nung” ta police ketdangser kati ashi.
Iba sentong ya Bengaluru nung aliba tenlaki ka nung ‘Power and Reality of the Kingdom’ omen nung ajemdaker agitsüba liasü.
America nunger sayutsüngir anati social media nung tenati Maharashtra nung yimtsüng ka semdangba aser iba sentong nung nisung 8,000 dak tema adenba indang noksatem sayuba atema Hindutva activist temi tena anema nokdak.