Bengaluru nung Manipur nunger ka dak azük

Bengaluru, August 30 (Agencies): Manipur nungi arishi küm 32 tain tebur ka dak Bengaluur nung Hombar aonung azükba sülen pa tang HOSMAT mozüki nung temang anepaludar.
S Paukhanmung tekolak aser teka tabelen yirua lir. Kasa mapang nung police temi iba dak sendakba nung ken o ka benokogo aser nisung asem puogo. Pua alirtem rongnung ana Orissa nungi aser ka Kerala nungi lir.
Paukhanmung ya Hotel Empire, Jayanagar branch nung house keeping staff ka ama inyaka liasü. Pa yimtii ita asem tejakdang aru.
Paukhanmung kicha dang hotel terrace nung moko achiba atema senchi sen 100 achiba asoshi pai anema aposuba agi hotel manager-i pa dak ama aser iba ajanga iba ken o tenzük.
Manipuri Meitei Association Bangalore (MMAB) General Secretary aser Manipuri diaspora züngsem Yambem Arun Meetei-i ashiba agi, mezüngbuba tatalokba August 27 nü pa terrace nung moko chia alidang atalok aser iba sülen pa dang Floor manager-i hotel policy nung aibelenba atema senchi sen 100 achi. Iba sülen pai anema aposuba atema operations manager pa dak ama.
August 28 aonung chichiyongba sülen pai operations manager den ajuruteba kechiba pa dak ama ta asüngdang aser iba sülen mangatettep adoka tangara densema pa dak azük tenzük. Yambem-i ashiba agi, Branch manager Sameer-i pa dak cricket stump agi azük aser iba sülen pa anepalu mesüi ghonda ishika takdang ka nung shibanger ayu.
Par medemertemi ashiba agi, parnoki pa dak aonung 9 nungi 12 ako tashi azük, aser anepdang 3 ako shi nung pa mozüki-i anir ao.
Kasa mapang nung Hotel ketdangsertemi ashiba agi, pa yi jemer liasü.Public Relations Officer, Empire Group of Hotels Mohammed Haneef-i ashiba agi, pai pa dang senchi achiba sülen pa sorchiok daki ai aser uniform semzüker floor manager nokgdok. Tetsür(floor manager) dak teka sangshiba atema Operations manager dena rara mena. Iba ya August 27 nü atalok.
Maneni August 28 nü pa yi jemer arua operations manager dang kechiba pa dak ama ta asüngdangtsü tenzük aser iba ajanga lendong tuluba aküm.