Bengaluru nung Mizoram nunger lanur ka dak azük; asem puogo

Bengaluru, January 12 (Agencies): December 26, 2016 nü Bengaluru nung atalokba video ka koba IT yimtiba nungi temai adok, iba video nung Northeast state, Mizoram nungi küm 23 tain lanur ka tenüng agi ‘Jerry’-i gari anenba ayuba nungi mangatettep adoka par kiyongertemi pa dak ama, aser züka merenshi.
Bengaluru nung Akkayamma tesem nung iba video ya tangok, aser north-east tentet nung densema aliba nisung kati police nem agutsü. Iba tatalokba ya nisung bendanga amshia inyakba ken o dak sentaka lir, ta north-east purtemi mepelai ashi. NE helpline dang tatalokba ajakji metetdaktsüba sülen police nema metetdaktsü.
Jerry ya Mizoram nungi lir, aser pa ‘spa’ ka nung kou mejeper ka lir. Gari anena ayudak gari anenba tsütsü nungi par kiyongertem den mangatettep adok. Par kiyongertem- Clifford Wilson (80), par jabaso Carlton Wilson (56) aser pa kinungtsü Lynn Wilson (54) nungeri senteper pa dak merang intong agi azük, aser parnoki ashiba ama meinyakra maneni azüktsü ta pa merenshi.
Iba tatalokba ya northeast tsür ka dak Kammanahalli nung küm tasen nung tim mesüi kongshiba, aser Arunachal nungi lanur ka mejungi züker tasü-taküm na tsüngda yutsüba tatalokba sülen anogo ishika lir temai adok.