Bengaluru nung Naga nungeri timtem ajurur

Dimapur, March 27 (Agencies): COVID-19 wara adokba aser linük ajunga anogo 21 shibangba mapang Naga Students’ Union Bangalore (NSUB)-i Bengaluru nung Naga nungertem mapa balala agi yarir.
March 26, 2020 nü NSUB-i Wonderla nung Naga nunger ana kümzük. Wonderla ya Bengaluru tezülen water amusement park ka lir aser tena idakji anogo ananü chiyungtsü shitak mengui timtema liasü.
Iba osang angashiba sülen NSUB den Bengaluru Police-i Wonderla nung oa Naga nunger anaji kümzüka anir aru.
Ano, NSUB-isa Indiranagar nung aliba PG ka nungi Naga kaketshir ka Shanthi Nagar-i anir ao. Iba mapa ya Bendang Yanger Ao aser Bengaluru police teyari ajanga inyaktet, ta Media Cell NSUB-i metetdaktsü.
“PG kiburtemi Naga nungertem meindoker aser iba jagi onoki Bengaluru Police teyari agia kaketshirtem Shantinagar nung aliba Naga PG kati anir ogo” ta NSUB ketdangpur Akuzo Lohe-i ashi.
“Bengaluru nung Naga nunger bendanga amshir aser dokantemi aodang ‘Corona’ ta ajar. Iba khuret ya onoki Nagaland Chief Minister aser Chief Secretary dangi züluogo aser tena nungi telangzüba tajung nguogo” ta paisa ashi.
Akuzo Lohe (NSUB Media cell) – +91 98801 63922
Mughato Kiba (NSUB President) – +91 89518 20724
Bengaluru nung aliba Naga nungertemi timtem mesüra nüngdak adokra Akuzo Lohe (NSUB Media cell) +91 98801 63922 mesüra Mughato Kiba (NSUB President) +91 89518 20724 na den tongteptsü atema metetdaktsüogo.