Bengaluru Police-i Nagaland nungi tetsür ka apu

Bengaluru, January 4 (Agencies): Bengaluru nung spa nung inyaktsü mapa agütsütsü ta tiyazü shia tetsür kati Northeast tsürtem teküp ayokba mapa inyakdaktsü.
Iba osang ya Central Crime Branch (CCB)-i angazük aser parnoki tetsürla apuba den spa nungi mobile phone ka, sen 3,000, condom packets kar angu aser aiür asem kümzük.
Bengaluru Police-i apuba tetsürlaji Nagaland nungi lir aser la ya arishi küm 29 tain Katty Rudy lir ta jangjaogo.
Katty Rudy-i tesüiba ita trok tashi Jayanagar nung lar spa nung teküp ayokba mapa inyaka aru. Brihostibar aonung police-i spa mita aodang la apu.
Women and narcotics wing, CCB, Bengaluru nung police inspector S Ayesha-i ashiba agi, anogo ishika tejakdang parnoki massage parlour nung ozüng alema mapa inyakba osang angashi.
“Iba spa nungi kümzükba tetsür tanurtemji state remand home for women nung yua lir. Parnoki ashiba agi Rudy-i parnok tejak nemshitsü aser kou mejebtsü atema mapa nungi aniok saka tashiyim agi teküp yokdaktsü” ta Ayesha-isa ashi.
Northeast state tem nungi tetsürtem kümzükba sülen North East Solidarity Forum (NESF) president Dr Rini Ralte-i “tsüraburtemi jungjunga bilemdanger ang pei tanurtem mapa inyaktsü atema tangaleni yoktsüla” ta metetdaktsü.
NESF ajanga Karnataka nung NE nungertem dak sendakba onüktem atema mapa inyaker.
“Police-i mapang shia NE dak sendakba teloktem den iba ama parlour tem jangjatsüla. Parnoki yimti nung lapoka aliba spa kiburtem osang metettsüla. Yamaji asü nungdang NE tetsürtem indang osang asenok jangjatsü” ta Ralte-isa shisem.