Benjong nung sen aaba

Tanü lima nung benjongbentsü amongba ya rongsen laluba mapang dangbo masü saka rongsen yangluba mapang tajung ka kümogo. Ibayongji, rongsen bushi metettertem asoshibo benjong mapang nung sen aika aar. Benjong tetezü süoshi tajung agir pelatepa chiyongtsü tajung chiajema amongba mapang lir, anungji benjong mapang kar senotsü endoktsü saka karbo senotsü aazüktsü. Atangji, telok ana rongnungji senotsü aaba telokji tajungba. Ajisüaka, nisung ajakibo senotsü aazüktsü makoktsü kechiyong benjong nung senotsü aatsü bilemer dang nungibo senotsü endoka benjong amongtsü bilemer teimba asütsü. Iba jagiang benjong longsur. Ajisüaka, tanü yangi benjong nung sen aaba indang yimobilem züluba nükjidong yabo asenok rongnung kari danga benjong mapang ya senotsü aatsü mapang tajungtiba ta reprangteta inyakdaktsüner. Tang ya asenok asoshi Christmas benjong mapang lir. Iba benjong mapang asenoki süoshi nungi tenzüker benjong ki naro aser chiyongtsü tapu balala aliba nung sen endokba sükdangra Nagaland kija nunga sen crore aika adoktsü. Atangji, dokan tulu nung süoshi aser oset tasen tapu balala bener arua ayokba agi benjong mapang parnok sen aika ajangzüker. Itemji teti dokan amenertemi dang inyaktettsü. Ajisüaka, asenokia benjong mapang ya senotsü nung tajangzük anguba mapang ka südaktsütsüsa inyaktsübaji takoktsü maparen aika lir. Item rongnungji, asenoki Christmas petinu yanglua ayoktsüa akok, kechiyong Christmas mapang kibong ajaki Christmas petinu kakabosa ajungketa yuner. Ano, karibo Santa Claus-i asemba süoshi mesüra korang arüa ayoktsüa akok. Ano, karibo Christmas narojung (wreath) aser cake yanglua ayoktsüa akok. Ano, nisung karibo Christmas mapang Christmas tree yanglutsü atema lepzüka ayoktsü asoshi mitsüktsüdong lu ayimtsüa akok. Iba amaji benjong asünungji shi, ango aser amtsük tapu balala yanglua ayoktsü asoshi bilemdangtsüla. Item jagi asenok nem benjong amongdang senotsü endokba dang nungibo tajangzük anguba teimba asütsüsa shisalen sayutsü. Tanübo asenoki asenok libaliro ya reprangdangra, benjong amongba mapang senotsü ajangzüktsü bilema inyaktsü melen, benjong amongtsüa kecha maka meshimetsüa senzür. Tangar benjong amongtsü renemtepdang asenokbo meshimetsüa senzütsübaji temeimtsüka aser taaktsüka lir. Item tia ajakji asenoki tarutsü ita anasemka asoshia dena sentong meyangluteti kecha meinyak kazüa süidaktsüba ajanga lir. Alima nung meshimetsü mesüi jangratema anisüngzüka alitsüba shisatsü ya bilemdangba nungi arur. Tang ya nübortem kechi nüngdaker (?) ta bilemdanga item nüngdakji anepalua bener arua ayokba ajanga nisung aika business nung takok angur. Aji oda, tangarbo benjongmong dang masü saka alima anogomong tongtibang ka amongtsü lira, iba anogomong tenüng nung langkabosa yanglua ayoktsü meranger. Ibayongji, tesayurtem anogo nung tesayurtem nem agütsütsü asoshi card aser narojung yanglua ayoker. Iba amaji tetsütem aser tebutem anogo nung agütsütsü asoshi oset tapu balala yanglur. Itemji ajizüka, asenokia moatsü aser tsüngremmong ya senotsü aser mapang endokba benjongmong dangbo masü saka senotsü ajangzükba benjongmong mapang ka asütsüsa karibosa inyaktsüla. Item nüngdaktemji lanurtemi reprangtettsüla. Nisung ka pei mapa nung takok ngua jangratema lia aotsüba yabo kaket nung zülua mali saka peisasa bilemdanga aser reprangteta inyaktsüla. Tanü asenoki itemji bilemdanga meinyakba agi, benjong nung aser benjong masüdanga asenokbo timtema dang alir. Asenoki nia kechi yanglua ayoktsü (?) tabo tebilema mebilemer saka kechi alitsü ta asüba nung dang asenoki temulung ajak agütsür. Ibayongji, asenok tayoktsüa maka aser talitsüa maka sensaker. Tang nungi danga asenoki benjong mapang ya lalushipongba aser meshimetsüba mapang masü ta bilema benjong matongdangyongi jelia benjong mapang ayoktsü oset mesüra chiyongtsü langka danga yanglutetra, benjong mapang ya asenok asoshi shisabolutsüba mapang masü saka tepelatsü mapang asütsü.