Benjong nung sen aar

Akhidangbo asenok asoshi benjong ya bendena akaba endokba aser chiajema lalushiponga amongba mapang ka dang liasü, kechiyong asenoki züsenteba aser yanglutetbatem yoka rongsen akümtsü asoshi asenoki tebilema mebilem aser yokdi asüyonga talir-a mali asü. Ajisüaka, tanübo angatibo kecha manguba lima ka nung asenok alir asünungji, ajak ayoker aser yamaji ajak alia agir. Iba ama lima ka nung sentong yangluba ajak nung inyak ashir atemabo sen aatsü lenmang sadema lapoka lir. Tatishitsü agi, lokti ka senden alinung, iba lokti jagi parnoksasa soruchioka chiyongba dang nungibo kar nem sen agütsür soruchiokdaktsüba dalangba adoker, anungji lokti asoshi soruchiok ashir atemabo lokti senden alibaji sen aadak tesem tajung ka akümer. Iba kasaji tanü asüngbo kiyir benjong nunga kiburi masü saka soruchioker telok kar nem soruchiokdaktsübasa tayongba, dalangba aser tajungba adoker asünungji, soruchiok ashir atemabo kiyir benjong ya sen aatsü mapang tajung ka lir. Iba amaji taküm küma ano Kisama nung Hornbill benjong amongtsü mapang anasai arur. Ibai Naga nunger ajak asoshi state government-i ayongba benjong lir. Iba benjong nung Naga kin ajak nungi arua yartsüngsanga pelateptsü aser benjong longsuteptsü atema saisapong tapu balala sayatsü sentong nung lir. Atangji, iba benjong ya district ajak nung alir masü asünungji, Kohima dak alaka tanga district nung alirtembo kangabo majangzüktsü. Ajisüaka, iba benjong amongdak Kisama-ibo benjong reprangi ana aser talang nungi raliwalirtem aika arua chiajema amongtsü. Nagaland nung alirtema aika iba benjong reprangi lulena aotsü. Iba ama benjong tulu nisung meyirijang aika adenshia longsutepba sentong ya aika asoshi sen yanglutsü mapang tajung ka asütsü. Item raliwalirtem mener senzüba gari amshirtem, parnok anenzüka chiyongba hotel kiburtem aser parnoki asenok dang nungi kechisarina aliba nungi senotsü aika ajangzüktsü. Ibaji metetertemibo iba ama benjong mapang ayoktsü asoshi oset tapu balala yanglua atar aser item nung jagi tajangzük tulu angur. Ano, tanübo Mother’s aser Father’s day aser Christmas mapang ya dena sen yanglu ashir atemabo sen aatsü mapang tajung ka amai kümdaktsüogo. Iba ama mapang nung card aser sempettem yanglua ayokba kija nungi nisung aika takar akümer. Ano, Christmas mapang ya balaka card dang masü saka Christamas cake yanglur aser decoration tapu balala enoker. Itemji sen aika jenjang lir. Item tajangzüktemji meteta asenokia benjong amongba ya endoktsüba dang masü saka aatsü asoshia mapang tajung lir ta angateta inyaktsü junger. Asenok asoshi tangazüktsü lesson kaji, China nungertem ya, parnok ishika dak alaka, Khristanpurtem masü. Ajisüaka, Khristmas süngdong dena decoration dak sendakba oset ajak China nung yanglur aser alima ajunga dang ayoker. Aji oda, Khristmas decoration osettemjia Cummunist purtemi yanglubasa tajungba aser dalangba asünungji parnok dang nungi alima ajungai alia decoration yangluteper. Iba amaji tangar atemabo benjong ya chiyongtsü aser decoration oset yangluba industry tulu amai züngshia inyaker. Item ama shisatsü aser mapaji ajizüka asenokia asenok benjongbentsütem ya asenok asoshi senotsü aadak industry ama asena asen yari kümdakja inyaktettsüla.